இறந்த கணவனின் பிரேதப் பெட்டியில் நசுங்குண்டு இறந்த மனைவி

இறந்த கணவனின் சடலத்தை நல்லடக்கம் செய்வதற்கு சென்ற மனைவி, கணவனின் பிரேதப் பெட்டி தலையில் விழுந்ததால், அதில் நசுங்குண்டு மரணமடைந்த பரிதாப சம்பவம் பிரேஸிலில் இடம்பெற்றுள்ளது.
பிரேஸிலின் றியோ கிரான்டே டுசுல் (Rio Grande do Sul) மாநிலத்திலுள்ள அல்வோர டா (Alvorada)நகரைச் சேர்ந்த ஜோஸி, சில்வெயிரா கொயிம்பிரா (Josi Silveira Coimbra) (76 வயது), ஞாயிற்றுக்கிழமை களியாட்ட நிகழ்ச்சியொன்றில் கலந்து கொண்ட வேளையில் மாரடைப்பால் மரணமானார்.

இந்நிலையில் மறுநாள் அவரது சடலம் நல்லடக்கத்திற்காக காரில் எடுத்துச் செல்லப்பட்ட போது, அக்காரின் முன் ஆசனத்தில் அவரது மனைவியான மார்சினா சில்வா பார் செலொஸ் (Marciana Silva Barcelos) (67 வயது) அமர்ந்திருந்தார்.

இந்நிலையில் பிரேதக் காரானது பிறிதொரு காருடன் மோதி விபத்துக்குள்ளானதில், பிரேதப் பெட்டி சரிந்து மார்சினா தலைமீது மோதியது. அதை அடுத்து அவர் ஸ்தலத்திலேயே மரணமானார்.

இச்சம்பவத்தில் மார்சினாவின் மகன்களில் ஒருவரும் பிரேதக் காரின் சாரதியும் , சிறு காயங்களுக்கு உள்ளாகிய நிலையில் மருத்துவமனையில் சிகிச்சை பெற்று வருகிறார்.