சுண்டிகுளம் கடற்பரப்பில் புலிகள் மீது தாக்குதல்; ஐவர் பலி : பாதுகாப்பு தரப்பினர்

முல்லைத்தீவு சுண்டிகுளம் கடற்பரப்பில் விடுதலைப்புலிகளின் படகொன்றின் மீது தாம் நடத்திய தாக்குதலில் 5 புலிகள் கொல்லப்பட்டதாகப் பாதுகாப்பு தரப்பினர் தெரிவித்துள்ளனர்.

பொதுமக்கள் சென்ற நான்கு படகுகளைக் கடற்படையினர் கண்காணித்துள்ளனர். இந்த படகுகளுக்கு அருகில் தமது படகுகள் சென்ற போது, ஒரு படகில் இருந்து கடற்படையினரை நோக்கித் தாக்குதல் நடத்தப்பட்டதாகவும் இதனையடுத்துத் தாம் அந்த படகின் மீது பதில் தாக்குதல் நடத்தியதாகவும் கடற்படையினர் குறிப்பிட்டுள்ளனர்.

இதனையடுத்து படகில் மேற்கொண்ட சோதனையின் போது, 5 சடலங்களையும் 2 ரி56 துப்பாக்கிகள், ஒரு கைதுப்பாகி ரி.என்.ரி ரக வெடி மருந்துகளையும் இரவில் பார்க்கும் தொலைநோக்கி கருவி, நீருக்குள் நீந்திச் செல்லப்பயன்படுத்தப்படும் கருவி, வரைப்படம் ஆகியவற்றை கைப்பற்றியதாகவும் கடற்படையினர் தெரிவித்துள்ளனர். ஏனைய படகுகளில் சென்ற 54 பொதுமக்களைத் தாம் காப்பற்றியதாகவும் கடற்படையினர் தெரிவித்தனர்.