ஆயுதங்களைக் கைவிட்டுப் புலிகள் சரணடையவேண்டும்; மோதல்களுக்கு முடிவு கட்ட சர்வதேசம் தயாராகவேண்டும் - அமெரிக்கா

இலங்கையில் மோதல்களை முடிவுக்குக் கொண்டுவரும் வகையில், புலிகள் ஆயுதங்களைக் கையளித்து மூன்றாம் தரப்பொன்றிடம் சரணடையவேண்டும் என்று, அமெரிக்க இராஜாங்கத் திணைக்களப் பேச்சாளர் றொபேர்ட் வூட் கோரிக்கை விடுத்துள்ளார்.
“பொதுமக்களை தடுத்து வைத்து அவர்களுக்கு தீங்கு விளைவிப்பதை தமிழ்ப் புலிகள் நிறுத்தவேண்டும். தமது ஆயுதங்களை கீழே வைத்துவிட்டு அவர்கள் மூன்றாம் தரப்பு ஒன்றிடம் சரணடையவேண்டும்‘‘ என்று வூட் தெரிவித்தார்.

இலங்கையில் மோதல்களை முடிவுக்குக் கொண்டுவருவதற்கு இந்தியா எடுத்துவரும் முயற்சிகளை ஆதரிப்பதாகவும் தெரிவித்துள்ள அவர், ராஜபக்ச அசாங்கமும், விடுதலைப் புலிகளும் மோதல்களை முடிவுக்குக் கொண்டுவர ஆவண செய்யவேண்டும் என்றும் வலியுறுத்தினார்.

இணைத்தலைமை நாடுகளும் ஜீ 8 நாடுகளும் மிகவும் நெருக்கமாக இந்த விடயத்தில் இணைந்து பணியாற்றுவதாகத் தெரிவித்த வூட், மோதல்களுக்கு முடிவுகட்ட சர்வதேச சமூகம் தயாராக இருக்கவேண்டும் என்று வலியுறுத்தினார்.

இலங்கை ஜனாதிபதிக்கும், ஐ.நா. செயலாளரின் பிரதிநிதி நம்பியாருக்கும் இடையில் நடைபெற்ற பேச்சுவார்த்தையில் இணக்கம் காணப்பட்டபடி, மோதல் தவிர்ப்புப் பிரதேசத்துக்கு ஐ.நா. பிரதிநிதிகளை அனுப்பும் ஐ.நா. செயலாளரின் தீர்மானத்தை தாம் பூரணமாக ஆதரிப்பதாக வூட் தெரிவித்தார்.

இயன்றளவு விரைவில் ஐ.நா. பிரதிநிதிகள் மோதல் தவிர்ப்புப் பிரதேசத்துக்குச் செல்வதற்கு இலங்கை அரசாங்கம் அனுமதிக்கவேண்டும் எனவும், சோதனை நிலையங்களைக் கடந்து உதவிப்பொருள்கள் தொடர்ச்சியாக அனுப்பப்படுவதற்கு வேண்டிய ஏற்பாடுகளையும் இலங்கை அரசாங்கம் செய்யவேண்டும் என்றும் அவர் வலியுறுத்தினார்.

இடம்பெயர்ந்த மக்கள் தொடர்பான பதிவுகளை ஐ.நா.வுடன் அரசாங்கம் பகிர்ந்துகொள்ளவேண்டும் என்று தெரிவித்த வூட், மக்களைத் தங்கவைப்பதற்குத் தேவையான மேலதிக கூடார வசதிகளைக் கண்டுபிடிக்கவேண்டும் எனவும், மோதல் தவிர்ப்புப் பிரதேசத்திலிருந்து மருத்துவத் தேவையுள்ளவர்களை வெளியேற்றும் நடவடிக்கையைத் தொடரவேண்டும் என்றும் இலங்கை அரசாங்கத்திடம் கோரிக்கை விடுத்தார்.

அமெரிக்க இராஜாங்கத் திணைக்களம் இலங்கை அரசாங்கத்துடன் தொடர்ந்தும் வழமையான கலந்துரையாடல்களில் ஈடுபட்டு வருவதுடன், இலங்கை விவகாரம் தொடர்பாக இந்தியாவுடன் தொடர்பில் இருப்பதாகவும் வூட் தெரிவித்தார்.

ஆயிரக்கணக்கான பொதுமக்கள் இந்தப் பகுதியிலிருந்து வெளியேறியிருக்கின்ற போதிலும், ஏராளமானவர்கள் கொல்லப்பட்டிருப்பதுடன், இன்னும் ஆயிரக்கணக்கானவர்கள் மோதல் நடைபெறும் பகுதிகளில் சிக்கியிருப்பதாக வூட் தெரிவித்தார். இவர்களுடைய பாதுகாப்புத் தொடர்பாக அமெரிக்கா மிகுந்த கவலையடைந்துள்ளது என்றும் அவர் குறிப்பிட்டார்.