புத்தாண்டைக் குழப்ப புலிகள் திட்டமிடுவர்! எச்சரிக்கிறார் இராணுவப் பேச்சாளர்

யுத்தத்தில் மிகப்பெரும் தோல்வியைச் சந்தித்து வரும் புலிகள் தமிழ் சிங்கள புதுவருட கொண்டாட்டங்களையும் நிகழ்வுகளையும் குழப்புவதற்கான நடவடிக்கையில் ஈடுபடக் கூடும் என்று இராணுவப் பேச்சாளர் பிரிகேடியர் உதயநாணயக்கார தெரிவித்தார்.
இது தொடர்பாக மக்கள் அனைவரும் மிகவும் விழிப் பாக இருக்க வேண்டும் என்றும் அவர் வேண்டுகோள் விடுத்தார்.

கொழும்பில் உள்ள தேசிய பாதுகாப்புக்கான ஊடக மத்திய நிலையத்தில் நேற்று இடம்பெற்ற ஊடகவியலாளர் சந்திப்பில் கலந்துகொண்டு உரையாற்றியபோதே அவர் இவ்வாறு கூறினார். ஊடகங்கள் இது தொடர்பான விரிவான பிரசாரங்களை மக்கள் மத்தியில் கொண்டு சென்று அவர்களை விழிப்படையச் செய்ய வேண்டும் என்றும் அவர் ஊடகங்களைக் கேட்டுக் கொண்டார்.

இதேவேளை தற்போது புலிகளின் கட்டுப்பாட்டிலிருந்து 61 ஆயிரத்து 157 பேர் வவுனியாவுக்கு வருகைத் தந்துள்ளனர் என்றும் இன்னும் 30 ஆயிரம் தொடக்கம் 40 ஆயிரம் வரையிலான பொது மக்களே புலிகளின் கட்டுப்பாட்டுப் பகுதியில் உள்ளனர் என்றும் அவர் சொன்னார்.