பிரபாகரனுடைய கொள்கைகளுக்கும் எமக்கும் உடன்பாடு கிடையாது -பிரபாகரனின் பெற்றோர்!

வவுனியா நிவாரணக் கிராமத்தில் பொதுமக்களுடன் தங்கியிருந்த புலிகளின் தலைவர் வேலுப்பிள்ளை பிரபாகரனின் பெற்றோர் படையினரால் இனங்காணப்பட்டிருப்பதாக இராணுவத் தளபதி ஜெனரல் சரத் பொன்சேகா தெரிவித்திருந்தமை தெரிந்ததே.

பிரபாகரனின் தந்தையான 84வயதுடைய திருவேங்கடம் வேலுப்பிள்ளை தாயாரான 78வயதுடைய வல்லிபுரம் பார்வதி ஆகிய இருவருமே வலயம் நான்கிலுள்ள மெனிக்பம் நிவாரணக் கிராமத்தில் வைத்து படையினரால் இனங்காணப்பட்டுள்ளனர் என்றும் இராணுவத் தளபதி தெரிவித்துள்ளார்.

இராணுவத்தின் 59வது படைப்பிரிவினரை நாடி இறுதியாக தப்பி வந்த பொதுமக்கள் கூட்டத்துடனேயே இவர்களும் மேமாதம் 17ம் திகதி முல்லைத்தீவிலிருந்து தப்பிவந்துள்ளனர். பிரபாகரனை விட்டு பிரிந்து தனியாகவே தாம் வாழ்ந்து வந்ததாகவும், அவருடைய கொள்கைளுக்கும் தமக்கும உடன்பாடு கிடையாதெனவும் பெற்றோர் படையினரிடம் தெரிவித்துள்ளனர்.

பிரபாகரனது பெற்றோருக்கு அங்கே தங்கியிருக்கும் ஏனைய பொதுமக்கள் மூலம் ஏற்படக்கூடிய அநாவசிய தொந்தரவுகளை தவிர்க்கும் வகையில் அவர்கள் தனித்து வைக்கப்படவிருப்பதாகவும் ஜெனரல் தெரிவித்துள்ளார்.

தமது மகனான பிரபாகரன் பயங்கரவாத செயற்பாடுகளில் ஈடுபட்ட வந்தார் என்பதனை பிரபாகரனின் பெற்றோர் பகிரங்கமாக ஒத்துக் கொண்டுள்ள நிலையில் பிரபாகரனினது பயங்கரவாத செயற்பாடுகளுக்கு அவரது பெற்றோர் பொறுப்புக் கூற வேண்டுமெனவும் இராணுவத் தளபதி கருத்து வெளியிட்டுள்ளார்.

படையினரின் தகவல் அடிப்படையில் பிரபாகரனின் பெற்றோர் சமாதான காலத்தின்போது தமிழகம் திருச்சியில் வசித்து வந்த நிலையில் மீண்டும் இலங்கை வந்துள்ளனர். விசுவமடு மற்றும் புதுக்குடியிருப்பு பகுதியில் வாழ்ந்து வந்த இவர்கள் மோதல் இடம்பெற்ற காலப்பகுதியில் பாதுகாப்பு வலயத்திற்கு வந்து சேர்ந்ததாகவும் தெரிவிக்கப்படுகின்றது.

இதேவேளை பிரபாகரனும் மகன் சார்ள்ஸ் அன்ரனியும் உயிரிழந்தை டீ.என்.ஏ பரிசோதனையில் உறுதியாகியிருப்பதாகவும் இராணுவத்தளபதி தெரிவத்துள்ளார்.

அதிரடி இணையம்