தனது உயிரையும் மதிக்காது போராடி தீயிலிருந்து பூனைக்குட்டிகளை காப்பாற்றிய நாய்

தீப்பற்றி எரிந்த வீடொன்றுக்குள் உயிருக்காக போராடிக் கொண்டிருந்த புதிதாக பிறந்த பூனைக் குட்டிகளை, தனது உயிரையும் மதிக்காது துணிச்சலுடன் செயற்பட்ட நாயொன்று காப்பாற்றிய அதிசய சம்பவம் அவுஸ்திரேலியாவின் மெல்போர்ன் நகரில் இடம்பெற்றுள்ளது.
லியோ என்றழைக்கப்படும் இந்நாயானது, "நாயும் பூனையும் போல் சண்டையிடுவது" என்ற உவமானத்தை பொய்யாக்கியுள்ளதாக தீயணைப்பு சேவை அதிகாரி கென் பிறவுன் தெரிவித்தார்.

மேற்படி வீட்டில் நள்ளிரவு தீ விபத்து ஏற்பட்டதையடுத்து தீயணைப்பு படைவீரர்கள் அங்கு விரைந்தனர். இந்நிலையில் அவ்வீட்டில் இருந்த நாயானது வீட்டை விட்டு வெளியேறமாட்டேன் எனப் பிடிவாதம் பிடித்து எரியும் வீட்டினுள் ஓடியது.

தீயணைப்பு படைவீரர்கள் நாயின் செயற்பாட்டுக்கு காரணம் என்ன எனப் புரியாமல் திகைத்து நிற்க, அந்நாயானது புகை மூட்டத்திற்கு மத்தியிலிருந்து வாயில் பூனைக்குட்டியை கௌவியபடி வெளிப்பட்டது. இவ்வாறு அந் நாய், நான்கு பூனைக்குட்டிகளையும் காப்பாற்றியுள்ளது.