''இந்திய மண்ணில் புலிகள் இனி வன்முறை செய்ய மாட்டார்கள்''

இலங்கை தமிழ் எம்.பி.அதிரடி பேட்டி!

இலங்கையைச் சேர்ந்த தமிழ் தேசிய கூட்டமைப்பின் எம்.பி.க்கள் தமிழகத்தில் பல தலைவர்களையும் சந்தித்துப் பேசி வருகிறார்கள். இங்கு நடைபெறும் உண்ணாவிரதம், போராட்டங்கள், பொதுக்கூட்டங்கள் போன்றவற்றில் பார்வையாளர்களாக அமருகிறார்கள்.

தமிழக காங்கிரஸ் தலைவர்களையும் சந்தித்து, ஈழத் தமிழர்களின் சார்பில் கோரிக்கைகளை எடுத்து வைக்கிறார்கள். விரைவில் இலங்கை அதிபர் ராஜபக்சே இந்தியா வரவிருக்கின்ற சூழ்நிலையில், இந்தக் கூட்டமைப்பைச் சேர்ந்த இலங்கை எம்.பி. சிவாஜிலிங்கத்தை சந்தித்தோம். ஈழப் பிரச்சினை தொடர்பான நம் கேள்விகளுக்கு அவர் அளித்த பதில்கள் இங்கே!



* "விடுதலைப் புலிகளுக்கு எதிராகவே இலங்கையில் ராணுவ நடவடிக்கை எடுக்கப்படுகிறது' என்று இலங்கை அதிபர் ராஜபக்சே மீண்டும் மீண்டும் கூறி வருகிறாரே...?

விடுதலைப் புலிகளுக்கு எதிரானது என்று கூறிக் கொண்டாலும்கூட அது இலங்கை தமிழ் மக்களை அழிக்கின்ற இனப்படு கொலைக்கான யுத்தம் என்பதே எங்கள் கருத்து. இதைத்தான் நாங்கள் இலங்கை பாராளுமன்றத்திலும் கூறியுள்ளோம்; வெளியிலும் கூறியுள்ளோம். அதுதான் உண்மை.

* இலங்கை அதிபர் தற்போது "4-டி' பாலிஸியை அறிவித்துள்ளார். அதன்படி புலிகளுக்கு எதிரான நடவடிக்கையே "முதல் டி' (க்ங்ம்ண்ப்ண்ற்ஹழ்ண்ள்ஹற்ண்ர்ய்) ஆக இருக்கிறது. தமிழர் பிரச்சினைக்கு தீர்வு காண முதலில் இது முக்கியம் என்கிறாரே...!

இலங்கை சுதந்திரம் அடைந்த காலத்திலேயே இனப்பிரச்சினை தீர்க்கப்படவில்லை. ஈழத் தமிழர் தலைவர்களுடன் செய்துகொண்ட ஒப்பந்தங்களை அமல்படுத்தாமல்விட்டார்கள். அதனால்தான் ஆயுதப் போராட்டமே உருவெடுத்தது. அதற்கு ஓர் அரசியல் தீர்வு காணப்படவேண்டும். அதை விடுத்து அழிப்பதோ, பலவீனப்படுத்துவதோ முடியாத காரியம்.

"விடுதலைப் புலிகளுக்கு எதிரான நடவடிக்கை வேறு, தமிழர்களுக்கான அதிகாரப் பகிர்வு வேறு' என்றோ, "4-டி' என்றெல்லாமோ சொல்வதெல்லாம் வெறும் ஏமாற்று வேலை. முன்பு பிரதமராக இருந்த பிரேமதாசாகூட "மூன்று சி' (ஸ்ரீர்ய்ள்ன்ப்ற்ஹற்ண்ர்ய், ஸ்ரீர்ய்ள்ங்ய்ள்ன்ள், ஹய்க் ஸ்ரீர்ம்ல்ழ்ர்ம்ண்ள்ங்) என்று சொன்னார். இவர் "4-டி' என்று சொல்கிறார். இப்படிப்பட்ட "ஏ', "பி', "சி', "டி'க்களை நாங்கள் பார்த்துவிட்டோம். ஒட்டுமொத்தமாக தமிழின மக்களை அடிமைப்படுத்தி ஏமாற்ற நினைக்கும் சிங்கள ஆட்சியாளர்களின் மனநிலையைத்தான் இது காட்டுகிறது.

* சமீபத்தில் தமிழக முதல்வரை சந்தித்த இந்திய வெளியுறவுத் துறை அமைச்சர் பிரணாப் முகர்ஜி, "போர் நிறுத்தத்தில் இந்தியா எந்த விதத்திலும் பார்ட்டியாக இல்லை' என்ற ரீதியில் கூறியுள்ளார். இதன் மூலம் நார்வே பேச்சுவார்த்தை, போர் நிறுத்தம் எல்லாம் இந்தியாவின் கவனத்திற்கு வராமலேயே நடந்தது போலிருக்கிறதே?

நார்வே நாட்டின் பேச்சுவார்த்தைகள் எல்லாம் இந்தியாவுக்குத் தெரிந்தே நடந்தது என்றும், அந்நாட்டுப் பிரதிநிதிகள் இந்தியாவுடன் ஆலோசித்து இந்தப் பேச்சுவார்த்தையில் நடந்து கொண்டார்கள் என்றும்தான் ஊடகங்கள் மூலம் தெரிந்து கொண்டோம். இந்தியா எல்லா விஷயங்களையும் கவனித்தே வந்துள்ளது.
எங்களைப் பொறுத்தவரை இலங்கையில் போர் தீவிரம் அடைவது பூர்வீக இலங்கைத் தமிழர்களுக்கு மட்டுமல்ல... இந்திய வம்சாவளிகளான மலையகத் தமிழ் மக்களும் லட்சக்கணக்கில் வாழ்கிறார்கள்.

அவர்களும் கொல்லப்படும் நிலைமை இப்போதே ஆரம்பித்துவிட்டது. ஆகவே அவர்களையும் பாதுகாக்க வேண்டிய கடமை இந்தியாவுக்கு உண்டு. அகதிகள் பெருமளவில் தமிழ்நாட்டுக்கு வந்து கொண்டிருக்கிறார்கள். தமிழ்நாட்டில் மக்கள் உணர்வுகள் மிகவும் கொந்தளிப்பாக இருக்கிறது. ஆகவே இந்திய அரசு தலையிட்டு அங்கு நடைபெறும் போரை உடனடியாக நிறுத்துவதற்கான நடவடிக்கையை துரிதமாக எடுக்க வேண்டும் என்று வேண்டுகிறோம்.

* இந்தியா -இலங்கை ஒப்பந்தம்; 13வது சட்டத் திருத்தம்; அனைத்துக் கட்சிகளின் பிரதிநிதிகள் குழு என்று பல தீர்வுகள் முன் வைக்கப்பட்டன. இந்நிலையில் தமிழர்களுக்கு உண்மையான தீர்வுதான் என்ன?

இப்படிச் சங்கிலித் தொடர் போல் பல பிரேரணைகள் வந்தாலும், தமிழர்களின் உணர்வுகளை இலங்கை அரசு மதிக்கவில்லை என்பது தெளிவாகத் தெரிகிறது. ஒரு காலத்தில் இலங்கையில் தமிழ் அரசுகள் தனி அரசுகளாக இருந்தன. இந்தியா சுதந்திரம் பெற்ற போது ஜின்னா பிரிவினை கேட்டதுபோல், இலங்கை சுதந்திரம் அடைந்தபோதே எங்களுடைய தலைவர்கள் கேட்டிருந்தால் தமிழினத்திடம் தனி ஆட்சி இருந்திருக்கும்.

ஆனால் ஒன்றாக வாழ முடியும் என்று நம்பினோம்; நாங்கள் ஏமாற்றப்பட்டோம். சமஷ்டி ஆட்சியை நாங்கள் கேட்டோம். அதுவும் கிடைக்கவில்லை என்ற பிறகுதான் தனிநாடு கோரிக்கை எழுந்தது. இப்பிரச்சினைக்கு 13-வது அரசியல் சட்ட திருத்தமோ, அரைகுறை அரசியல் தீர்வோ தீர்வாக அமைய முடியாது. இடைக்கால அரசியல் அமைப்போ, கூட்டு இணைப்பு ஆட்சி (இர்ய்ச்ங்க்ங்ழ்ஹற்ண்ர்ய்) என்ற அடிப்படையிலோ பிரச்சினைக்கு தீர்வு காண இலங்கை அரசு விரும்பினால் எங்கள் மக்கள் பரிசீலிப்பார்கள். விடுதலைப்புலிகளும் நிச்சயமாக அதை பரிசீலிப்பார்கள்.

* கூட்டு இணைப்பு ஆட்சி பற்றி சற்று விரிவாகச் சொல்லுங்கள்...?

கான்ஃபெடரேஷன் என்று சொன்னால் இரண்டு பிரதமர்கள் இருப்பார்கள். அதில் தமிழரும் பிரதமராக இருப்பார். இந்த முறையில் பாதுகாப்பு, வெளிவிவகாரம் போன்றவை பொதுவான விஷயங்களாக இருக்கும். இதை ஏற்றுக்கொள்ள இலங்கை தயார் என்றால் அதை நாங்கள் பரிசீலிக்க முடியும்.

இதுபோன்ற ஓர் அமைப்பு அடங்கிய தீர்வை, 1995ஆம் ஆண்டு ஜனாதிபதி சந்திரிகா குமாரதுங்கா அவர்களுக்கும், விடுதலைப் புலிகளுக்கும் இடையில் ஏற்பட்ட பேச்சுவார்த்தையின் போது, லண்டனில் உள்ள சட்ட நிறுவனம் ஒன்று கொடுத்தது. 1995-ல் பரிசீலிக்க முடியும் என்றால் 2008-ல் நிலைமை மோசமடைந்துள்ள சூழ்நிலையில் ஏன் அந்த கான்ஃபெடரேஷன் பற்றி பரிசீலிக்கக்கூடாது என்பதுதான் எங்களுடைய கேள்வி.

* ஆனால் அதற்கு இலங்கை அரசியல் சட்டத்தைத் திருத்த வேண்டும். 225 எம்.பி.க்களில் 60க்கும் குறைவான எம்.பி.க்களை மட்டுமே தன் கட்சியில் வைத்துக்கொண்டு கூட்டணி ஆட்சி நடத்தும் அதிபர் ராஜபக்சேவால் இதுபோன்ற தீர்வைக் கொடுக்க முடியுமா?

அவர் கட்சிக்கு குறைந்த எம்.பி.க்கள் இருந்தாலும் ஆட்சி நடத்த அவருக்கு பெரும்பான்மை இருக்கிறது. அது பிரச்சினையல்ல. அதிபர் ராஜபக்சே அதைச் செய்ய விரும்பவில்லை என்பதுதான் இங்கே தெளிவு. ஏனென்றால் "இந்திய- இலங்கை' ஒப்பந்தப்படி ஏற்பட்ட இரு மாகாண இணைப்பு (கிழக்கு-வடக்கு மாகாணம்) செல்லாது என்று இலங்கை உச்ச நீதிமன்றம் தீர்ப்பளித்தது.

அத்தீர்ப்பிலேயேகூட "இது சட்ட ரீதியாக ஓர் டெக்னிக்கலான விஷயத்தில் அளிக்கப்பட்ட தீர்ப்பு. இணைப்பு வேண்டுமென்றால் பாராளுமன்றத்தில் சாதாரண பெரும்பான்மையுடன் தீர்மானம் கொண்டு வந்து நிறைவேற்றிக் கொள்ளலாம்' என்றே கூறப்பட்டது. அரசுக்கு சாதாரணப் பெரும்பான்மை இருக்கிறது. அதற்கும் மேல் ரணில் விக்ரமசிங்கேயும், நான் உள்பட 22 தமிழ் எம்.பி.க்களும் அப்படியொரு தீர்மானம் வந்தால் ஆதரிப்போம் என்று அறிவித்திருந்தோம்.

அது மாதிரி சூழ்நிலையில், மூன்றில் இரண்டு பங்கு மெஜாரிட்டி வந்துவிடுகிறது. அப்படியிருந்தும் "மாகாண இணைப்பு' விஷயத்தில் இந்தியப் பேரரசின் ஒப்பந்தத்தையே கிழித்து குப்பைக் கூடையிலே வீசியவர் அதிபர் ராஜபக்சே. இவருடைய நடவடிக்கையை ஏன் இந்தியா இன்னும் புரிந்து கொள்ளவில்லை என்பதுதான் எங்களுக்கு வேதனையாக இருக்கிறது.

* தற்போது, "தமிழக முதல்வருக்கு இலங்கை வருமாறு அழைப்பு விடுப்பேன்' என்று அதிபர் ராஜபக்சே கூறியுள்ளார். அதுபோல் விடுதலைப் புலிகளோ, தமிழர் கட்சிகளோ முதல்வருக்கு அழைப்பு விடுப்பீர்களா?

அதிபர் ராஜபக்சேயின் அழைப்பு ஒட்டுமொத்த ஏமாற்று வேலை. ராஜபக்சேயின் வயது 63. முதலமைச்சர் கலைஞரின் அரசியல் அனுபவம் அதற்கும் மேலானது. அதிபரின் பசப்பு வார்த்தை மற்றும் ஏமாற்று வித்தைகளுக்கு மயங்க தமிழக முதல்வர் ஒன்றும் ஏமாளி அல்ல. ஆகவே முதல்வருக்கு அழைப்புவிடும் முன்னர் இலங்கையில் உள்ள தமிழ் மக்களை முதலில் மனிதர்களாக ராஜபக்சே நடத்தட்டும்.

அங்கு ஒற்றை ஆட்சி முறையைக் கைவிட்டு, பெüத்த மத ஆட்சியைத் துறக்கத் தயார் என்பதை அவர் முதலில் அறிவிக்கட்டும். மற்றபடி முதல்வர் உட்பட இந்தியாவிலும், தமிழகத்திலும் உள்ள கட்சிகள் இந்த விஷயத்தில் தலையிட வேண்டும்; இலங்கைக்கு கண்காணிப்புக் குழுவாகச் சென்று இந்த விஷயங்களில் நேரடியாக ஈடுபட வேண்டும் என்பதே எங்கள் ஆசை.

* புலிகளுடன் இந்திய அரசு பேச்சுவார்த்தை நடத்த முடியாத சூழ்நிலை. ஆகவே விடுதலைப் புலிகள் அல்லாத தமிழர் கட்சிகளுடன் பேச்சுவார்த்தை நடத்தி ஒரு முடிவுக்கு வந்தால் அதை விடுதலைப் புலிகள் ஏற்றுக் கொள்வார்களா?

இந்திய அரசு தடை செய்யப்பட்ட விடுதலைப் புலிகள் இயக்கத்துடன் பேச்சுவார்த்தை நடத்த முடியாது என்பதை நான் ஒப்புக்கொள்ள மாட்டேன். அதற்கு இந்தியாவில் நாகாலாந்தை உதாரணமாக எடுத்துக் கொள்ளலாம். இந்தியா நினைத்தால் புலிகள் மீதான தடையை நீக்கி விட்டுக்கூடப் பேச முடியும்.



2006, டிசம்பரில் தமிழ் தேசிய கூட்டமைப்பு இந்தியப் பிரதமரை சந்தித்தபோது "நீங்கள் விடுதலைப் புலிகள் அமைப்புக்கும், இந்திய அரசுக்கும் இணைப்புப் பாலமாக இருக்க வேண்டும்' என்று எங்களிடம் வேண்டுகோள் விடுத்திருந்தார். பிரதமருடனான பேச்சுவார்த்தையில் பாதுகாப்பு ஆலோசகர் எம்.கே. நாராயணன் இதைக் கேட்டுக் கொண்டார். ஓர் இடைக்காலத்தில் பேச்சுவார்த்தைகளை முன்னெடுத்துச் செல்ல நாங்கள் இணைப்பு பாலமாக இருக்கத் தயார்.

* அப்படியொரு அனுமதியை விடுதலைப் புலிகள் மற்ற தமிழர் அமைப்புகளுக்கு கொடுத்துள்ளார்களா?

2004ஆம் ஆண்டு தமிழ் தேசிய கூட்டமைப்பின் தேர்தல் அறிக்கையில், "தமிழீழ விடுதலைப் புலிகள்தான் தமிழ் மக்களின் ஏகபோக பிரதிநிதிகள்' என்றோம். அதற்கான ஆணையை மக்கள் தந்துள்ளார்கள். அதற்கு முன்பே 2002ல் சமாதான ஒப்பந்தம் செய்த போதே விடுதலைப் புலிகளின் தலைவர் பிரபாகரன், மறைந்த தமிழ்ச்செல்வன் ஆகியோர் எங்களுடன் கலந்து பேசித்தான் அரசியல் முடிவுகள் அனைத்தையும் எடுத்தார்கள். இன்னும் சொல்லப் போனால் நாங்கள் விடுதலைப் புலிகளுடன் கடந்த காலத்தில் ஆயுத ரீதியாக மோதிய இயக்கங்கள்.



தமிழர் விடுதலைக் கூட்டணியின் தலைவர் அமிர்தலிங்கம் புலிகளால் கொல்லப்பட்டார். அதேபோல் தமிழீழ விடுதலை (டெலோ) இயக்கத்தின் தலைவர் ஸ்ரீசபாரத்தினம், ஈழமக்கள் புரட்சிகர விடுதலை முன்னணி (ஈ.பி.ஆர்.எல்.எஃப்) தலைவர் பத்மனாபா ஆகியோர் விடுதலைப் புலிகளால் கொல்லப்பட்டார்கள்.

இப்போது இந்த மூன்று கட்சிகளும் தமிழ் தேசிய கூட்டமைப்பிலே சேர்ந்து செயல்படுகிறோம். நான்காவதாக காலஞ்சென்ற குமார் பொன்னம்பலம் அவர்களின் அகில இலங்கை தமிழ் காங்கிரஸýம் இந்தக் கூட்டமைப்பில் இருக்கிறது. ஆயுத மோதல்களில் ஈடுபட்ட நாங்கள் எல்லாம் ஒற்றுமைப்பட்டு முன்னேறி வருகிறோம் என்பதுதான் உங்கள் கேள்விக்கு பதில்.

* ஆனாலும் மற்ற தமிழர் இயக்கங்கள் பேசுவதை வைத்துக்கொண்டு புலிகளை நம்ப முடியாது என்ற நிலை இந்தியாவிலும், தமிழகத்திலும் இருக்கிறதே...?

மற்ற இயக்கங்கள் இந்திய அரசுடன் ஒரு தீர்வைக் கண்டால் அதை புலிகள் ஏற்கமாட்டார்கள் என்ற கருத்தில் நீங்கள் சொல்கிறீர்கள். ஆனால் மாறி வருகின்ற சூழ்நிலையில் விடுதலைப் புலிகளும், பல விஷயங்களில் மாற்றம் அடைந்துள்ளார்கள். கடந்த காலங்களிலே அவர்கள் ஒரு சில தவறுகள் செய்திருக்கலாம்.

இன்றைக்கு அவர்களிடம் ஏற்பட்டுள்ள மாற்றத்தை நாங்கள் மனப்பூர்வமாக நம்புகின்றோம். இன்றைய சர்வதேச சூழ்நிலையில், விடுதலைப்புலிகள் அப்படியொரு பின்னடைவு செய்தால் (ஏற்காவிட்டால்) அது இந்தியா போன்ற நாடுகளிலும், சர்வதேச அளவிலும் விடுதலைப் புலிகளைக் கடுமையாகப் பாதிக்கும். ஆகவே நிச்சயமாக அந்தத் தவறை அவர்கள் செய்ய மாட்டார்கள். இந்திய அரசு தலையிட்டு வரும் முடிவினை நிச்சயம் அவர்கள் ஏற்றுக் கொள்வார்கள் என்ற நம்பிக்கை எங்களுக்கும், மக்களுக்கும் இருக்கிறது.

* ஆனால் முன்னாள் முதல்வர் ஜெயலலிதாவிற்கு புலிகளிடமிருந்து கொலை மிரட்டல் வந்துள்ளது. தமிழக தலைவர்களை மிரட்டுவது தீர்வுக்கு உதவுமா?

புலிகள் பெயரிலே ஒரு சிலர் மிரட்டல்கள் விடுவது, ஈழத்தமிழர் போராட்டத்தை சிதைப்பதற்காக ஈழத் தமிழர்களுக்கு எதிரான சக்திகள் செய்யும் வேலை. ஏனென்றால் இந்திய மண்ணிலோ, தமிழக மண்ணிலோ எந்த விதமான வன்முறைச் செயலிலும் இனி புலிகள் ஈடுபட மாட்டார்கள் என்பதை எங்களால் அறுதியிட்டுச் சொல்ல முடியும்.

புலிகளுக்கு பாதிப்பு ஏற்பட்டால்கூட ஒரு சதவிகிதம்கூட இந்திய மண்ணில் வன்செயல் செய்யமாட்டார்கள். அதுபற்றி நினைத்துப் பார்க்கவே மாட்டார்கள். இதுபற்றி நாங்கள் ஏற்கெனவே அவர்களுடன் பேசியிருக்கின்றோம். தமிழ்ச்செல்வனின் மரண சடங்கிற்கு பின்னர் நவம்பர் 6-ம் தேதி புதிய பொறுப்பாளர் நடேசன் அவர்கள், "நான் தலைவர் பிரபாகரனிடம் பேசியிருக்கிறேன். இந்தியாவுக்கு எதிரான சக்திகள் நமக்கு ஆயுத உதவி செய்ய முன் வந்தார்கள்.

அதை தலைவர் வேண்டாம் என்று கூறி விட்டார். தலைவரைப் பொறுத்தமட்டில் இந்தியா நமக்கு உதவி செய்யவில்லை என்றால்கூட பரவாயில்லை. இலங்கை அரசுடன் போராடி அழிவை சந்திக்கும் சூழ்நிலை வந்தால்கூட நாம் இந்தியாவுக்கு எதிரான சக்திகளிடமிருந்து ஆயுதம் வாங்கக் கூடாது' என்றார். இந்தச் செய்தியை இந்திய மக்களுக்குச் சொல்லுங்கள்'' என்று எங்களிடம் சொன்னார். இதை இப்போது பகிரங்கமாகவும், அழுத்தம் திருத்தமாகவும் தமிழக மற்றும் இந்திய மக்களுக்குச் சொல்ல விரும்புகிறோம்.

* விரைவில் இந்தியா வருகிறார் இலங்கை அதிபர் ராஜபக்சே. அதற்கு முன்பு கிழக்கு மாகாணத்தில் தமிழ் டி.ஐ.ஜி. ஒருவரை நியமித்துள்ளார். இது பற்றியெல்லாம் என்ன கூற விரும்புகிறீர்கள்?

கிழக்கு மாகாண முதலமைச்சர் பிள்ளையன் "மாநிலப் போலீஸ் சர்வீஸ் வேண்டும்' என்றார். அது 13 வது அரசியல் சட்டத் திருத்தத்திலும் இருக்கிறது. அதைக் கொடுக்க விரும்பாமல் தமிழ் டி.ஐ.ஜி.யாக சங்கர் என்பவரை நியமித்துள்ளார். பிள்ளையன் கோரிக்கையைத் திசை திருப்பவே இப்படிச் செய்துள்ளார் அதிபர்.

இது ஒரு தீர்வாகாது. இந்த சங்கரை பொன்சேகாவாக மாற்ற அதிபருக்கு எவ்வளவு நாள் ஆகும்? ஆகவே, இனி மேலாவது பிள்ளையனும், கருணாவும் அதிபர் ராஜபக்சேயின் உண்மை நிறத்தைப் புரிந்து கொள்ள வேண்டும். ராஜபக்சே இந்தியாவுக்கு வரும்போது, "முதலில் யுத்தத்தை நிறுத்துங்கள்' என்று இந்தியா அவரிடம் சொல்ல வேண்டும். ஏனென்றால் நாங்கள் நிம்மதியாக அங்கே கஞ்சி குடிக்க விரும்புகிறோம்.

போர் நிறுத்தம் இல்லையென்றால் அங்குள்ள அப்பாவித் தமிழினத்தை முற்றிலும் அழித்து விடுவார்கள். பிறகு இந்தியா அனுப்பும் 800 டன் உணவுப் பொருள்கள் ஈழத்தமிழரின் வாய்க்கரிசிக்குத்தான் பயன்படும்! தமிழர்களுக்கு வாய்க்கரிசி போட இந்தியா துணை போக வேண்டாம் என்று கேட்டுக் கொள்கிறோம்.

சந்திப்பு: எம்.காசிநாதன்

நன்றி : தமிழன் எக்ஸ்பிரஸ்


http://www.tamilanexpress.com/cover/cover.asp