சீன நாட்டவர்களுக்கும் இலங்கை கிராமவாசிகளுக்கும் இடையே மோதலில் இரு தரப்பினருக்கும் காயம்

பிங்கிரிய, தல்கஹபிட்டியப் பகுதியில் நேற்று முன்தினம் ஞாயிற்றுக்கிழமை இரவு இரு சாராருக்கிடையில் ஏற்பட்ட மோதலின் போது, 5 பேர் படுகாயமடைந்து சிலாபம் வைத்தியசாலையில் அனுமதிக்கப்பட்டுள்ளதாக பிங்கிரிய பொலிஸார் தெரிவித்தனர்.

இம் மோதல் சீன நாட்டவர் சிலருக்கும், கிராம மக்களுக்குமிடையில் ஏற்பட்டுள்ளது.

நுரைச்சோலை அனல் மின் நிலையத்திற்கு வேலை செய்ய வந்துள்ள சீன நாட்டவர்கள் தங்கிய வீட்டிற்கு, குடி போதையில் வந்த இளைஞனை அவர்கள் பிடித்து வைத்ததையடுத்து இம் மோதல் ஏற்பட்டுள்ளது.

இதன்போது சீன நாட்டைச் சேர்ந்த ஒருவரும், அக்கிராமத்தைச் சேர்ந்த நால்வரும் படுகாயமடைந்து வைத்தியசாலையில் அனுமதிக்கப்பட்டுள்ளனர்.

சீன நாட்டைச் சேர்ந்தவர் மேலதிக சிகிச்சைக்காக கொழும்புக்கு மாற்றப்பட்டுள்ளதாகவும், இது தொடர்பான மேலதிக விசாரணைகளை மேற்கொண்டு வருவதாகவும் பிங்கிரிய பொலிஸார் தெரிவித்தனர்.