ஸ்ரீ லங்கா கார்டியன் இணைய தளம் நேற்று முதல் தடை

ஸ்ரீ லங்கா கார்டியன் என்ற இணைய தளத்தை அரசாங்கம் நேற்று முதல் தடைசெய்துள்ளதாக பிறிதொரு இணைய தளத்தில் செய்தி வெளியிடப்பட்டிருக்கின்றது. அரசாங்கத்துக்கு ஆதரவான அரசியல் செய்திகளையே மேற்படி இணையத்தளம் வெளியிட்டு வந்தது. அண்மைக் காலமாக வடபகுதி நிலவரங்களையும் இடம்பெயர்ந்தோர் முகாம் பற்றிய செய்திகளையும் ஸ்ரீ லங்கா கார்டியன் வெளியிட்டது. அமைச்சர் கருணாவை விமர்சித்து அவரது மனைவி வெளியிட்ட கருத்துக்களை வெளியிட்டமையே அரசின் தடை உத்தரவுக்குக் காரணம் என்று ஜனாதிபதி ஊடகப் பிரிவின் சிரேஷ்ட அதிகாரி ஒருவர் தெரிவித்ததாகவும் அந்தச் செய்தியில் குறிப்பிடப்பட்டுள்ளது. ஸ்ரீ லங்கா கார்டியன் இணையத் தள ஆசிரியர் நிலந்த இலங்கக்கடுவவுக்கு எதிராகக் கடந்த சில நாட்களாக கொலை அச்சுறுத்தல் விடுக்கப்பட்டு வருவதாகவும் தெரிவிக்கப்படுகின்றது.