பிரபாகரன் தம்பி கண்ணீர் பேட்டி

இலங்கையில் அதிபர் தேர்தல் களைகட்டியுள்ளது.​ அதிபராக இருக்கும் ராஜபக்úஸயும்,​​ அவரை எதிர்க்கும் முன்னால் ராணுவத் தளபதி ஃபொன்சேகாவும் கடும் போட்டியில் இருக்கிறார்கள்.​ இந்தப் பரபரப்பான சூழ்நிலையில் விடுதலைப் புலிகள் தலைவர் பிரபாகரனின் தந்தை வேலுப்பிள்ளை மரணம் அடைந்ததாத திடீரென்று அறிவிக்கப்பட்டுள்ளது.​ அவர் நீண்ட நாட்களாக உடல் நலம் இல்லாமல் இருந்தார் என்றும்,​​ அதனால் இறந்துவிட்டார் என்றும் இலங்கை அரசு தரப்பில் அறிவிக்கப்பட்டுள்ளது.​ "அப்படிப்பட்ட மோசமான உடல்நிலையிலும் கூட ஏன் இலங்கை அரசு வேலுப்பிள்ளையை ராணுவ முகாமில் அடைத்து வைத்தது?​ மருத்துவமனையில் சேர்த்து அவருக்கு ஏன் சிறப்புச் சிகிச்சைகள் அளிக்கவில்லை?' என்ற கேள்வி எழுகிறது.​ அது மட்டுமின்றி வேலுப்பிள்ளை தமிழகம் திரும்ப ஆர்வமாக இருந்த நேரத்தில் இப்படியொரு செய்தி வந்தது அதிர்ச்சியளிக்கும் விதமாக இருக்கிறது.

இந்நிலையில் தமிழகத்தில் உள்ள தமிழீழ விடுதலைப்புலிகள் இயக்கத் தலைவர் பிரபாகரனுடைய பெற்றோருடன் உடன் பிறந்தோர் மற்றும் ரத்த சம்பந்த உறவினர்கள்,​​ மீடியாக்களிடம் பேசுவதை விரும்பத்தகாத செயலாக இதுவரை கருதி வந்தனர்.​ பிரபாகரனின் தந்தை வேலுப்பிள்ளை மரணமடைந்ததைத் தொடர்ந்து அவரின் நெருங்கிய உறவினர்கள் மீடியாக்களிடம் கொஞ்சம் வாய்திறக்க ஆரம்பித்துள்ளனர்.​ வேலுப்பிள்ளை மரணம் குறித்து ஒவ்வொரு விதமாகச் செய்திகள் வந்து கொண்டிருக்க,​​ நாம் திருச்சி மாவட்டம் முசிறியில் தங்கியுள்ள பிரபாகரனின் சித்தப்பா மகன் ராஜேந்திரனிடம் பேசினோம்.

பிரபாகரனின் தந்தை வேலுப்பிள்ளை எவ்வளவு நாள் உங்களுடன் இருந்தார்?​​

எனது அப்பாவும்,​​ திருவேங்கடம் வேலுப்பிள்ளையும் உடன் பிறந்த சகோதரர்கள்.​ எனக்கு வேலுப்பிள்ளை பெரியப்பா உறவு.​ 1980களில் புலம் பெயர்ந்து தமிழகம் வந்த நாங்கள் திருச்சி கே.கே.நகரில் ஒரு வாடகை வீட்டில் தங்கியிருந்தோம்.​ பெரியப்பா குடும்பமும் எங்கள் குடும்பமும்,​​ ஒன்றாகவே தங்கியிருந்தது.​ அண்ணன் பிரபாகரன் அவ்வப்போது அங்கே வந்துவிட்டுப் போவார்.​ பிறகு நாங்கள் முசிறிக்கு இடம் பெயர்ந்தோம்.​ நான் ஒரு மெடிக்கல் கடையைத் துவக்கி நடத்தி வந்தேன்.​ திருச்சியில் தங்கியிருந்த பெரியப்பா வேலுப்பிள்ளை,​​ பெரியம்மா பார்வதி ஆகியோருக்கு சில அரசியல் பிரமுகர்களும்,​​ காவல்துறையினரும் பலவிதங்களில் நெருக்கடி கொடுத்தனர்.​ அப்போது பெரியம்மா பக்கவாதத்தால் உடல்நிலை பாதிக்கப்பட்டிருந்தார்.​ அதனால் 2000ம் ஆண்டு வாக்கில் கே.கே.நகரிலிருந்து குடி பெயர்ந்து,​​ முசிறி வந்து என்னுடன் தங்கினர்.​ முசிறி பழைய பேருந்து நிலையமருகே நான் நடத்தி வந்த மெடிக்கல் ஷாப்பின் பின் பகுதியில்தான் என் வீடு.​ அங்கே தங்கி பெரியம்மா சிகிச்சை எடுத்துக் கொண்டார்.​ பிறகு பெரியப்பாவும்,​​ பெரியம்மாவும் பிரபாகரனுடன் வசிக்கச் சென்றுவிட்டனர்.​ அங்கேயிருந்து அவ்வப்போது என்னைத் தொடர்பு கொண்டு பேசுவார்கள்.

ராஜேந்திரன்

எப்போது அவர்கள் ராணுவத்தின் பிடியில் சிக்கினார்கள்?
கடந்த வருடம்,​​ மே மாதம் பதினைந்தாம் தேதி வரை அண்ணனுடன் இருந்த பெரியப்பாவும்,​​ பெரியம்மாவும் முள்ளிவாய்க்கால் போரில் இலங்கைப் படை முன்னேறிய பிறகு அண்ணனை விட்டு வெளியேற்றி வைக்கப்பட்டனர்.​ மக்களோடு மக்களாகக் கலந்து வெளியேறியவர்களை ராணுவம் பிடித்து சித்திரவதை செய்தது என்று எங்களுக்குத் தகவல் கிடைத்தது.

வேலுப்பிள்ளை நோயினால் பாதிக்கப்பட்டு மரணமடைந்ததாக இலங்கை அரசு அறிவித்துள்ளதே?​​

பெரியப்பாவையும்,​​ பெரியம்மாவையும் ராணுவ முகாமில் அடைத்தார்கள்.​ 86 வயதான பெரியப்பா வேலுப்பிள்ளை திடகாத்திரமானவர்.​ அவருக்கு நோய்,​​ நொடி எதுவும் தாக்காது.​ எப்போதாவது ஜலதோஷம் பிடிக்கும்.​ ஜலதோஷம் கடுமையாக இருந்தால் மட்டும் மாத்திரை சாப்பிடுவார்.​ மற்றபடி அவர் எந்த நோய்க்காகவும் மாத்திரை சாப்பிட்டு நான் பார்த்ததில்லை.​ அப்படிப்பட்டவர் பக்க வாதத்தால் உடல்நிலை பாதிக்கப்பட்டு இறந்ததாக இலங்கை அரசு சொல்கிறது.​ இது சுத்தமான பொய்.​ அவருக்குப் பக்கவாதம் எதுவுமில்லை.

இலங்கை அரசு இப்படியொரு பொய் சொல்ல வேண்டிய அவசியமில்லையே?​​​

இலங்கை ராணுவம் தமிழர்கள் மீது பல அத்துமீறல்களை நடத்தியிருக்கிறது.​ மனித உரிமைகளைக் காலில் போட்டு மிதித்திருக்கிறது.​ இதனால் உலக நீதிமன்றத்தில் இலங்கையில் நடைபெற்ற இனப்படுகொலைக்கு எதிரான வழக்கு விசாரணைக்கு வரப் போகிறது.​ அந்த விசாரணைக்கு முக்கியமான சாட்சியாக வேலுப்பிள்ளை இருந்துவிடக்கூடாதே என்பதற்காக இலங்கை அரசு அவரைக் கொன்றிருக்கலாம் என்கிற சந்தேகம் எங்களுக்கு இருக்கிறது.

இந்த சந்தேகம் உங்களுக்கு எப்படி வந்தது?​​​

2009,​மே மாதத்திலிருந்து,​"பெரியப்பா வேலுப்பிள்ளையையும்,​​ பெரியம்மா பார்வதியையும் என்னுடன் சேர்ந்து வசிக்க இந்தியாவிற்கு அனுப்பி வையுங்கள்' என்று இலங்கை அரசிற்கு ஏராளமான கோரிக்கை மனுக்களை அனுப்பியுள்ளேன்.​ இந்திய அரசிற்கும் கோரிக்கை வைத்துள்ளேன்.​ அவர்கள் கடைசிக் காலத்திலாவது நிம்மதியாக வாழட்டுமே என்பதற்காக நான் இது போன்ற முயற்சிகளை எடுத்தேன்.​ ஆனாலும் பெரியப்பாவை கடைசிக் காலத்தில் நல்லபடியாக பார்த்துக் கொள்ள முடியவில்லை.​ இலங்கை அரசு ஏன் அவர்களை இந்தியாவிற்கு அனுப்பவில்லை?​ இப்போது பெரியப்பா இறந்துவிட்டார் என்றால் எப்படி ஏற்றுக்கொள்வது?

எஞ்சியிருக்கும் பிரபாகரனின் தாயை தமிழகத்திற்கு அனுப்பி சிகிச்சை அளிக்க ஏற்பாடு செய்ய வேண்டும் என்று சிவாஜிலிங்கம் எம்.பி.​ கோரிக்கை விடுத்துள்ளாரே?​​

"பெரியம்மாவையாவது என்னுடன் சேர்ந்து வசிக்க அனுப்பி வையுங்கள்' என இலங்கை அரசிடம் நானே கோரிக்கை வைத்துள்ளேன்.​ பிரபாகரனின் தங்கையான கனடாவில் ​ வசிக்கும் வினோதினி எனக்குக் கடிதம் எழுதி,​​ "அம்மாவை அழைத்து உங்களுடன் வைத்து கவனித்துக் கொள்ளுங்கள்' எனக் கூறியுள்ளார்.​ அம்மாவையாவது ​(பார்வதி)​ இறுதிக் காலத்தில் நிம்மதியாக எங்களோடு வாழ இலங்கை அரசு ஏற்பாடு செய்ய வேண்டும்.​ இதற்கு தமிழக அரசும்,​​ இந்திய அரசும் ஏற்பாடு செய்ய வேண்டும்.

அ.சாதிக்பாட்சா