முல்லைத்தீவில் நேற்றும் ஷெ­ல் வீச்சு; 72 பொதுமக்கள் பலி; 198 பேர் காயம்

முல்லைத்தீவு மாவட்டத்தில் உள்ள சுதந்திரபுரம் பகுதியில் நேற்றும் ஷெல் தாக்குதல்கள் இடம்பெற்றுள்ளன. இதில் 72 பேர் கொல்லப்பட்டுள்ளதுடன், 198 பேர் காயமடைந்துள்ளனர், தாக்குதல் நடைபெற்ற பகுதி கண்கொண்டு பார்க்க முடியாத அளவுக்கு பெரும் அவலம் மிகுந்ததாக இருக்கிறது எனத் தெரிவிக்கப்படுகிறது.
சுதந்திரபுரம் பகுதியில் இருந்து இடம் பெயர்ந்து கொண்டிருந்த மக்கள் மீது ஞாயிறன்று காலை 10 மணியில் இருந்து பிற்பகல் 3 மணி வரை கடும் ஷெல் தாக்குதல் நடத்தப்பட்டுள்ளது என இணையத்தளத் தகவல்கள் தெரிவிக்கின்றன.
இணையத்தளத்தில் வெளியிட்ட ஏனைய விவரங்கள் வருமாறு:
இரண்டு மைல் நீளமான தூரத்துக்கு மிகச் செறிவாக பல்லாயிரக்கணக்கான மக்கள் இடம்பெயர்ந்து கொண்டிருந்த போது, விமானப்படையின் விமானங்கள் வட்டமிட்டன எனவும் அப்போதே பீரங்கித்தாக்குதல் நடத்தப்பட்டது எனவும் கூறப்பட்டது.
சிறுவர்கள், பெண்கள், முதியவர்கள், பச்சிளம் குழந்தைகள் என பெரும் எண்ணிக்கையான மக்கள் உடல் சிதறிக் கொல்லப்பட, மேலும் பெருமளவிலானோர் படுகாயமடைந்து வீழ்ந்த பெரும் அவலம் அங்கு நிலவியது. கொல்லப்பட்டவர்களின் உடல்களையோ, அல்லது காயமடைந்து வீழ்ந்தோரையோ மீட்டு எடுக்க முடியாத அளவுக்கு தொடர்ந்து கடுமையான பீரங்கி தாக்குதல்கள் நடந்தவண்ணம் இருந்தன. இதனால் காயமடைந்தோரை மீட்க முற்பட்டவர்களும் காயங்களுக்கு உள்ளாகி வீழ்ந்தனர் எனவும் கூறப்படுகிறது.
இதேபோன்று பிற்கல் 3 மணியளவில் ஷெல் தாக்குதல் ஓய்ந்த பின்பு காயமடைந்தவர்கள் மீட்கப்பட்ட போது காயமடைந்த பலர் இறந்து போயிருந்தனர். இறந்தவர்கள் போக, காயமடைந்த நிலையில் இருந்த 198 பேர் மீட்கப்பட்டனர்.
காயமடைந்தோர் பலர் மீட்கப்பட்ட போதும் தற்போது வைத்தியசாலைகள் எதுவும் வன்னியில் இல்லாத நிலையில் மரங்களின் கீழும், கொட்டகைகளின் கீழம், வெறும் பாய்களின் மீது வைத்தே அவர்களுக்கு மருத்துவ சிகிச்சைகள் வழங்கப்படுகின்றது.
ஞாயிறன்று நடைபெற்ற தாக்குதலில் கொல்லப்பட்ட தமிழர்களின் எண்ணிக்கை 72 என முதற்கட்ட தகவல்களில் உறுதி செய்யப் பட்டுள்ளது. இருந்தாலும் மீட்புப்பணிகள் முழுமையாக நடைபெறாத நிலையில் இந்த எண்ணிக்கை மேலும் அதிகரிக்கலாம் என அஞ்சப்படுகின்றது என்று தெரிவிக்கப்பட்டுள்ளது.