இலங்கை தமிழர் பிரச்சினையில் இந்தியா தலையிட வேண்டும் - புலிகளின் அரசியல்துறைப் பொறுப்பாளர்

இலங்கை தமிழர் பிரச்சினையில் இந்தியா தலையிட வேண்டும் என்று புலிகளின் அரசியல்துறைப் பொறுப்பாளர் பா. நடேசன் தெரிவித்துள்ளார்.
இந்திய செய்தி நிறுவனம் ஒன்றுக்கு அளித்துள்ள பேட்டியிலேயே அவர் இவ்வாறு கூறியுள்ளார். அதில் அவர் மேலும் தெரிவித்துள்ளதாவது: எங்கள் தலைவர் பிரபாகரன் எங்கும் சென்று விடவில்லை. எங்கள் மக்களுடன்தான் இருக்கிறார். எங்களோடு இருக்கும் மக்கள் இங்கு காலம் காலமாய் வசிப்பவர்கள். அவர்கள் சொந்த மண்ணில்தான் இருக்கிறார்கள். இந்தியாவின் நலன்களுக்கு எதிராக நாங்கள் ஒருபோதும் செயல் பட்டது இல்லை. அவ்வாறு செயல்படும் நோக்கமும் எங்களுக்கு கிடையாது.இந்தியாவின் தென்முனையின் பாதுகாப்பு தமிழ் ஈழ மக்களின் நல்வாழ்வோடும், பாதுகாப்போடும் பின்னிப் பிணைந்துள்ளது.

இந்த பிராந்தியத்தின் வலிமை மிக்க நாடு இந்தியா. எப்போதும் எங்கள் பக்கத்தில் இருந்து தமிழர் பிரச்சினையில் தலையிட வேண்டும் என்பதே எங்கள் விருப்பம்.

இந்திய அரசுடன் நிபந்தனைகள் அற்றதும், தமிழ் மக்களின் சுய நிர்ணய உரிமைகளை உள்ளடக்கிய அரசியல் தீர்வை கொண்டதுமான பேச்சுக்களில் ஈடுபட எப்போதும் நாங்கள் தயாராக இருக்கிறோம்.