கோடிக்கணக்கான ரசிகர்களின் கண்ணீருடன் விடைபெற்றார் ஜாக்ஸன்!

உலகம் முழுவதும் கோடிக்கணக்கான ரசிகர்கள் கண்ணீர் விட்டு விடை கொடுக்க, பல்லாயிரக்கணக்கானோரின் நேரடி அஞ்சலியுடன், பொப் இசை உலகின் முடி சூடா மன்னன் மைக்கல் ஜாக்ஸன் நேற்றிரவு விடை பெற்றார்.

இதுவரை உலகில் யாருடைய இறுதிச் சடங்கும் இந்த அளவுக்குப் பிரமாண்டமானதாக இருந்திருக்க முடியாது என்று கூறும் அளவுக்கு மிகப் பிரமாண்டமாக, ஜாக்ஸனின் இசையை சுவாசித்தபடி, அவருக்குக் கண்ணீர் மல்க விடை கொடுத்தனர் அவரது ரசிகர்கள்.

ஜூன் 25ஆம் திகதி மரணமடைந்த ஜாக்ஸனின் உடல் அடக்க நிகழ்ச்சி நேற்று நடைபெற்றது.

தங்க முலாம் பூசப்பட்ட சவப்பெட்டியில் வைக்கப்பட்டிருந்த மைக்கல் ஜாக்ஸனின் உடல், பாரஸ்ட் லான் ஹில்ஸ் பகுதியில் உள்ள கல்லறைத் தோட்டத்தில் அடக்கம் செய்யப்பட்டது.

இந்த நிகழ்ச்சி தனிப்பட்ட குடும்ப நிகழ்ச்சியாக மட்டும் நடத்தப்பட்டதால், குடும்பத்தினர் தவிர வேறு யாரும் அதில் கலந்து கொள்ளவில்லை. ரசிகர்களும் பார்வையிட அனுமதிக்கப்படவில்லை.

அதன் பின்னர் மைக்கேல் ஜாக்ஸனின் கடைசி விருப்பப்படி அவரது நினைவஞ்சலி பிரபலமான ஸ்டேபிள்ஸ் மையத்தில் பிரமாண்ட கலை நிகழ்ச்சிகளுடன் தொடங்கியது.

உலகின் பல்வேறு பகுதிகளிலிருந்து குவிந்திருந்த 20 ஆயிரம் பேர் இந்த நினைவஞ்சலியில் கலந்து கொண்டனர்.

பாதிரியார் லூசியஸ் ஸ்மித் பிரார்த்தனையுடன் நிகழ்ச்சியைத் தொடங்கி வைத்தார். அதன் பின்னர் மரியா கேரி, டிரே லோரன்ஸுடன் இணைந்து பாடினார்.

ஜாக்ஸனின் புகழ் பெற்ற பாடல் ஒன்றை அவர் பாடினார்.

இசையுலகைச் சேர்ந்த பாரி கோர்டி, கூடைப்பந்தாட்ட வீரர்கள் மாஜிக் ஜான்ஸன், கோபே பிரையன்ட், ஜெனிபர் ஹட்சன், ஜான் மேயர் என பிரபலங்கள் பலரும் இதில் கலந்து கொண்டனர்.

பாடகர் ஸ்டீவி ஒன்டர் உருக்கமாகப் பேசி பாடினார். ஜாக்ஸனின் நெருங்கிய தோழியான டயானா ரோஸ் மற்றும் நெல்சன் மண்டேலா ஆகியோர் விடுத்த இரங்கல் செய்திகளைப் பாடகர் ஸ்மோக்கி ராபின்சன் வாசித்தார்.

முன்னதாக ஜாக்ஸனின் உடல் ஸ்டேபிளஸ் மையத்திற்கு ரசிகர்கள் அஞ்சலிக்காகக் கொண்டு வரப்பட்டது.

நிகழ்ச்சியில் ஜாக்ஸனின் ஐந்து சகோதரர்கள், இரு சகோதரிகள், மூன்று குழந்தைகள் உள்ளிட்ட குடும்பத்தினர் அனைவரும் கலந்து கொண்டனர்.

ஜாக்ஸனின் மகள் பாரீஸ் தனது தந்தை குறித்து பேசி முடித்ததும் அடக்க முடியாமல் கதறி அழுதார். அதேபோல ஜாக்ஸனின் சகோதரரான ஜெர்மைன் ஜாக்ஸனும் கண்ணீரைக் கட்டுப்படுத்த முடியாமல், ஸ்மைல் என்கிற பாடலைப் பாடினார்.

ஜாக்ஸனின் இறுதிச் சடங்கு நிகழ்ச்சியைப் பார்ப்பதற்காக அமெரிக்காவின் பல்வேறு பகுதிகளிலிருந்தும் கார்களில் ரசிகர்கள் கிளம்பியதால் பெரும் போக்குவரத்து நெருக்கடி ஏற்பட்டது.

உலகம் முழுவதும் ஜாக்ஸனின் நினைவஞ்சலி நிகழ்ச்சி நேரடியாக ஒளிபரப்பு செய்யப்பட்டது. மொத்தம் 16 டிவி நிறுவனங்கள் இதை நேரடியாக ஒளிபரப்பு செய்தன. கிட்டத்தட்ட உலகம் முழுவதும் உள்ள டிவி நிறுவனங்கள் நேரடி ஒளிபரப்பு செய்தன.

உலகின் மிகப் பெரிய மீடியா நிகழ்ச்சியாக மாறிப் போயிருந்தது ஜாக்ஸனின் நினைவாஞ்சலி நிகழ்ச்சி.

ரசிகர்கள் கண்ணீர் மல்க விடை கொடுக்க பூவுலகிலிருந்து விடை பெற்றார் ஜாக்ஸன்.