இலங்கையில் தமிழர் சுட்டுக் கொல்லப்படும் வீடியோ உண்மை -பிரிட்டிஷ் பத்திரிக்கை

இலங்கையில் விடுதலைப் புலிகளுடனான போரின் இறுதிக் காலப்பகுதியில், இலங்கை இராணுவத்தினர் கைதிகளை சுட்டுக் கொல்லுவதாக குற்றஞ்சாட்டி அது தொடர்பில் வெளியான வீடியோப் படங்கள் ஆதாரமானவையே என்று பிரிட்டிஷ் நாளிதழ் ஒன்று கூறுகிறது.


ஜனவரியில் எடுக்கப்பட்டதாக கூறப்படும் இந்த வீடியோ ஐரோப்பாவை தளமாகக் கொண்டு இயங்கும் ஒரு மனித உரிமை அமைப்பு வெளியிட்டிருந்தது.


இந்த வீடியோப் படப்பதிவில் இலங்கை இராணுவ சீருடையில் இருப்பதைப் போன்று தோன்றும் ஒருவர் நிர்வாணமாகவும், கண்கள் கட்டப்பட்ட நிலையிலும் இருந்த இருவரை சுட்டுக் கொல்வதாக காண்பிக்கிறது.


பிபிசி உட்பட இந்த வீடியோப் படப் பதிவு பல தொலைக்காட்சிகளில் ஒளிபரப்பாகியது.


ஆனால் இந்த வீடியோ புனையப்பட்ட ஒன்று என்று இலங்கை இராணுவம் கூறுகிறது.


எனினும் சுயாதீனமான தடயவியல் நிபுணர் ஒருவர் நடத்திய ஒரு ஆய்வில் அந்த வீடியோ படப்பதிவில் ஏமாற்றும் செயலோ அல்லது ஒட்டி வெட்டும் வேலையோ இடம் பெறவில்லை என்று தெரியவந்துள்ளதாக அந்த அந்த நாளிதழ் கூறுகிறது.


BBC Tamil

Read more...

மறைத்து உண்ட குற்றச்சாட்டுக்கு லண்டனில் உண்ணாவிரதம் இருந்த தமிழ் இளைஞர் மறுப்பு

இலங்கையில் யுத்தம் உச்சகட்டத்தை எட்டியிருந்த சமயத்தில், உடனடியாக போர்நிறுத்தம் வேண்டும் என்று கோரி லண்டனில் சாகும்வரை உண்ணாவிரதப் போராட்டத்தை நடத்திய தமிழ் இளைஞர், மெக் டோனால்ட்ஸ் பர்கர்களை சாப்பிட்டதாக பிரிட்டிஷ் பத்திரிக்கைகள் வெளியிட்ட செய்திகளை சம்மந்தப்பட்ட இளைஞர் மறுத்துள்ளார்.


இது ஒரு திட்டமிட்ட சதி என்றும் இந்த செய்திகளை வெளியிட்ட இரண்டு நாளிதழ்களுக்கு எதிராக தான் வழக்குத் தொடரப் போவதாகவும் உண்ணாவிரத சர்ச்சையில் சிக்கியுள்ள பரமேஸ்வரன் சுப்பிரமணியன் தமிழோசையிடம் தெரிவித்தார்.


உண்ணாவிரதம் இருந்த பரமேஸ்வரன் பர்கர்களை சாப்பிட்டதை போலீசின் ரகசிய கேமராக்கள் படம்பிடித்துள்ளதாக போலீஸ் வட்டாரங்களை மேற்கொள்காட்டி பிரிட்டிஷ் பத்திரிகைகள் செய்தி வெளியிட்டுள்ளன.

லண்டனில் ஏப்ரல் மே மற்றும் ஜூன் மாதங்களில் இலங்கையில் உடனடியாக போர் நிறுத்தம் செய்யப்பட வேண்டும் என்ற கோரி்க்கையை முன்வைத்து பெரிய அளவிலான போராட்டங்கள் இலண்டனில் உள்ள நாடாளுமன்றக் கட்டிடத்துக்கு முன்பு நடைபெற்றது. இந்தப் போராட்டங்களின் ஒரு பகுதியாகத்தான் உண்ணா விரதப் போராட்டமும் நடைபெற்றது.


இந்தப் போராட்டங்களுக்கு பாதுகாப்பளிக்க பிரிட்டிஷ் போலீசார் சுமார் 7 மில்லியன் பவுண்டுகளை செலவிட்டதாக கூறப்படுகிறது.




BBc Tamil

Read more...

பிரபல குத்துச் சண்டை வீரர் அலெக்ஸிஸ் அர்கில்லோ மரணம்

தென் அமெரிக்க நாடானா நிகராகுவாவைச் சேர்ந்த பிரபலமான குத்துச் சண்டை வீரர் அலெக்ஸிஸ் அர்கில்லோ தனது வீட்டில் இறந்து கிடந்தது தெரியவந்துள்ளது. அவர் தற்கொலை செய்து கொண்டிருக்கலாம் என்று கருதப்படுகிறது.

அலெக்ஸிஸ் மூன்று முறை உலக குத்துச் சண்டை பட்டத்தை வென்றவர். 1995 ஆம் ஆண்டு குத்துச் சண்டை போட்டிகளிலிருந்து ஓய்வு பெற்ற அவர் உலகளவில் 82 வெற்றிகளை பெற்றுளார். அதில் 65 முறை எதிரிகளை முழுதாக வீழ்த்தியும் உள்ளார்.

மூன்று பிரிவுகளில் உலகப் பட்டத்தை வென்றுள்ள ஆறு பேரில் அலெக்ஸிஸும் ஒருவர் என்பது குறிப்பிட்த்தக்கது.

1968 ஆம் ஆண்டு தொழில்முறை ரீதியில் போட்டியிட தொடங்கிய இவர் உலகப் போட்டிகளில் ஃபெதர் வெயிட், சூப்பர் ஃபெதர் வெயிட் மற்றும் லைட் வெயிட் பட்டங்களை வென்றவர்.


BBC

Read more...

பிரபாகரனின் உடலைக் கண்ட செய்தியாளர் தெரிவித்த கருத்துக்கள்

விடுதலைப் புலிகளுக்கும் இலங்கை இராணுவத்துக்கும் இடையே கடுமையான மோதல்கள் நடைபெற்ற முல்லைத்தீவின் கடற்கரைப் பிரதேசத்துக்குச் செல்ல செய்தியாளர்களை இலங்கை அரசு தொடர்ந்து அனுமதிக்காமல் இருந்தது. இருந்தும் சில செய்தியாளர்கள் இராணுவத்தினரால்

அந்தப் பகுதிக்கு அழைத்துச் செல்லப்பட்டிருந்தனர். கடந்த 6 நாட்களாக கிளிநொச்சியில் உள்ள 58 வது டிவிஷனின் தலைமையகத்தில் இருந்து களமுனைக்கு தினந்தோரும் சென்று வந்த ஹிந்து நாளிதழின் கொழும்பு செய்தியாளர் முரளீதர் ரெட்டி நேற்று செவ்வாய்கிழமை விடுதலைப் புலிகளின் தலைவரின் உடல் என்று அரசு கூறும் உடலையும் நேரில் பார்த்துள்ளார்.

பிரபாகரனின் உடலை நேற்று செவ்வாய் மாலை தான் பார்த்தாக கூறிய அவர், அந்த உடலை விடுதலைப் புலிகளின் முன்னாள் கிழக்குத் தளபதியும் தற்போதைய அரசாங்க அமைச்சருமான கருணாவும், படையினரிடம் சரணடைந்துள்ள தயா மாஸ்டரும், இராணவத்திடம் அடையாளம் காட்டியதாக குறிப்பிட்டார்.

பிரபாகரன் எப்படி இறந்தார் என்பது தெளிவாகாமல் உள்ளது என்றும், அந்த உடலில் சைனைட் அருந்தியதற்கான தடயங்கள் இல்லை என்று படையினர் தம்மிடம் கூறியதாகவும் ரெட்டி நம்மிடம் தெரிவித்தார். அவர் துப்பாக்கிச் சூட்டு காயம் காரணமாக இறந்ததாக தெரிவிக்கப்பட்டதாகவும் அவர் கூறினார்.

பிரபாகரனின் உடல் தவிர இராணுவ அதிகாரிகள், சார்ள்ஸ் அன்டனி உடலை காட்டியதாகக் குறிப்பட்ட அவர், பொட்டு அம்மானின் உடலை பார்க்கவில்லை என்றார். போர் பகுதியில் உள்ள உடல்களில் சில மிக மோசமான நிலையில் உள்ளதாகவும் அவர் கூறினார்

BBC Tamil

Read more...

போர்ப்பகுதியிலிருந்து 6000 பொதுமக்கள் வெளியேறி அரச படைகளிடம் வந்ததாக அரசு அறிவிப்பு

இலங்கையின் வடக்கே முல்லைத்தீவு மாவட்டத்தில் அரசாங்கம் அண்மையில் பிரகடனப்படுத்தியிருந்த பாதுகாப்பு வலயத்திற்கு அடுத்து அமைந்துள்ள முள்ளிவாய்க்கால், கரையான் முள்ளிவாய்க்கால், வெள்ளாம்முள்ளிவாய்க்கால் பகுதிகளில் இராணுவத்தினருக்கும் விடுதலைப்புலிகளுக்கும் இடையே உக்கிர சண்டைகள் தொடர்ந்து நடைபெறுவதாக களமுனைத் தகவல்கள் தெரிவிக்கின்ற அதேவேளை, இந்தப் பகுதியில் இராணுவத்தினர் நேற்றையதினம் ஏற்படுத்தியிருந்த பாதுகாப்பான பாதை வழியாக கடந்த 48 மணித்தியாலங்களில் ஆறாயிரம் பொதுமக்கள் இராணுவத்தினரிடம் வந்து சேர்ந்திருப்பதாக இராணுவ தரப்பில் தெரிவிக்கப்பட்டிருக்கின்றது.

இதனைவிட சுமார் 10 ஆயிரம் வரையிலான பொதுமக்கள் இராணுவத்தினரிடம் வந்து சேர்வதற்காக நீண்ட வரிசைகளில் காத்துநிற்பதாக இராணுவ தலைமையகம் கூறியிருக்கின்றது.

இதேவேளை, இன்று மாலை கரையான்முள்ளிவாய்க்கால் பகுதியை இராணுவத்தினர் விடுதலைப்புலிகளிடம் இருந்து கைப்பற்றியிருப்பதாகவும், இந்தப் பகுதியில் விடுதலைப்புலிகள் தடுத்து வைத்திருந்த 1400க்கும் மேற்பட்ட பொதுமக்களை இராணுவத்தினர் மீட்டிருப்பதாகவும் பாதுகாப்பு அமைச்சகம் தெரிவித்திருக்கி்ன்றது.

இராணுவத்தின் 58 மற்றும் 59 ஆம் படைப்பிரிவுகளைச் சேர்ந்த படையணிகள் முல்லைத்தீவு மாவட்டத்தின் கரையோரப் பகுதியில் எதிரெதிர் முனைகளில் முன்னேறி வருவதாகவும், இரு படைப்பிரிவுகளும் சுமார் 2கிலோ மீற்றர் தொலைவு இடைவெளியில் இருப்பதாகவும், விடுதலைப்புலிகளின் பலத்த எதிர்த்தாக்குதல்களுக்கு மத்தியிலும் இரண்டு படைப்பிரிவுகளும் விரைவில் இணைந்து கொள்ளவிருப்பதாகவும் பாதுகாப்பு அமைச்சகம் கூறியிருக்கின்றது.

வெள்ளாம்முள்ளி்வாய்க்கால் பகுதியில் விடுதலைப்புலிகளினால் மறைத்து வைக்கப்பட்டிருந்த இரண்டு விமான எதிர்ப்புப் பீரங்கிகளும் கனரக துப்பாக்கிகள் தானியங்கி துப்பாக்கிகள் உட்பட பல ஆயுதத் தளபாடங்களையும் இராணுவத்தினர் கைப்பற்றியிருப்பதாக இராணுவம் தெரிவித்திருக்கின்றது.

நேற்றும் இன்றும் நடைபெற்ற உக்கிர சண்டைகளில் டசின் கணக்கான விடுதலைப்புலிகளின் சடலங்களையும் ஆயுதத் தளபாடங்களையும் பல இடங்களிலும் இராணுவத்தி்னர் கைப்பற்றியிருப்பதாகவும் தெரிவிக்கப்பட்டிருக்கின்றது.

பல முனைகளில் அந்தப் பகுதியில் மோதல்கள் இடம்பெற்றுக்கொண்டிருப்பதனால் மக்கள் பெரும் பாதிப்புக்கு உள்ளாகியிருப்பதாகவும், அங்கு இயங்கி வந்த ஒரேயொரு மருத்துவமனையாகிய முள்ளிவாய்க்கால் மருத்துவமனையும் செயலிழந்துள்ளதாகவும், இதனால், காயமடைந்தவர்கள் பலரும் பராமரிப்பின்றி இருப்பதாகவும் பெரும் அவல நிலை அங்கு ஏற்பட்டிருப்பதாகவும் உறுதிப்படுத்த முடியாத தகவல்கள் தெரிவிக்கின்றன.

'கடற்புலி தளபதி சூசை குடும்பம் பிடிபட்டது'

இதற்கிடையே கடற்புலிகளின் சிறப்புத்தளபதி சூசையின் குடும்பத்தினரை இரண்டு உறவினர்களோடு, படகு ஒன்றில் தப்பிச் சென்ற போது கடற்படையினர் கைது செய்திருப்பதாக கடற்படைப் பேச்சாளர் தெரிவித்திருக்கின்றார். சூசை அவர்களின் மனைவி சத்தியதேவி, மகன் சுரேஷ், மகள் மதி இவர்களுடன் அவரது மைத்துனி மற்றும் அவரது மகன் ஆகியோரே இவ்வாறு கைது செய்யப்பட்டிருப்பதாகவும் கைது செய்யப்பட்டபோது அவர்களிடம் ஆறு லட்ச ரூபா ரொக்கப்பணமும், ஒரு தொகை தங்க நகைகளும் இருந்ததாகவும் கடற்படை தெரிவித்திருக்கின்றது,

இது இவ்விதமிருக்க, முள்ளிவாய்க்கால் பகுதியில் தொடரும் கடும் சண்டைகள் காரணமாக மோதல் பகுதிக்கான தமது மனிதாபிமான பணிகள் தற்காலிகமாக நிறுத்தப்பட்டிருப்பதாக அனைத்துலக செஞ்சிலுவைக்குழு அறிவித்திருக்கின்றது.

மோதல் நிலைமை காரணமாக அந்தப்பகுதியில் சிக்கியுள்ள காயமடைந்தவர்களை மீட்பதற்கும் இந்தப் பகுதி மக்களுக்கான உணவு விநியோகப் பணிகளையும் கடல் வழியாக தம்மால் மேற்கொள்ள முடியாதிருப்பதாகவும் அனைத்துலக செஞசிலுவைக்குழு கூறியிருக்கின்றது.

மோதல்கள் இடம்பெறும் பகுதிகளில் காயமடைந்தவர்களும், நோயாளிகளுமாக 800 பேர் வரையில் உடனடியாக அங்கிருந்து வெளியேற்றப்பட்டு உரிய மருத்துவ சிகிச்கையளிக்கப்பட வேண்டியவர்களாக இருப்பதாகவும் அனைத்துலக செஞ்சிலுவைக்குழு குறிப்பிட்டிருக்கின்றது,

BBC Tamil

Read more...

வழிபாட்டிடங்கள் மீது தாக்குதல்

லண்டனிலும், பிரான்ஸிலும் பெரும்பாலும் இலங்கையர்கள் வழிபாடு செலுத்தும் மேலும் இரண்டு வழிபாட்டிடங்கள் தாக்கப்பட்டுள்ளன.
இங்கு லண்டனில் கிங்ஸ்பரி பகுதியில் இருக்கின்ற சிறி சதாதிஸ்ஸ சர்வதேச பௌத்த மையம் என்னும் வழிபாட்டிடம் இன்று அதிகாலை சிலரால் தாக்கப்பட்டிருக்கிறது.

தாக்குதலை நடத்தியவர்கள் கற்களை வீசி மையத்தின் யன்னல்கள் மற்றும் கதவுகளுக்கு சேதம் ஏற்படுத்தி தப்பிச் சென்றுவிட்டதாக அந்த வழிபாட்டிடத்தை சேர்ந்த பௌத்த மதகுருவான பிய்டஸி தேரோ தெரிவித்துள்ளார்.

இது தொடர்பாக பொலிஸார் விசாரணைகளை நடத்தி வருவதாகவும் எவரும் இதுவரை கைது செய்யப்படவில்லை என்றும் அவர் கூறினார்.

அதேவேளை, கடந்த திங்களன்று இரவு பிரான்ஸின் பாரிஸ் பகுதியில், லாக்குரணோ என்னும் இடத்தில் உள்ள சிவன் கோயில் ஒன்றும் விசமிகளால் தாக்கப்பட்டுள்ளது.

பெட்ரோல் குண்டு வீசி ஆலய கோபுரம் தாக்கப்பட்டதாகக் கூறுகின்ற ஆலயத்தின் தலைமைக் அர்ச்சகரான சுதன் குருக்கள், இந்த சம்பவம் தொடர்பாக சிங்கள இனத்தைச் சேர்ந்த நான்கு பேரை பொலிஸார் கைது செய்திருப்பதாகவும் கூறினார்.

BBC Tamil

Read more...

இலங்கை நிலவரம் குறித்து ஐ.நா பாதுகாப்புச் சபையும் கவலை

இலங்கையில் மோசமாகிவரும் மனிதாபிமான நிலைமைகள் தொடர்பில் ஐ.நா மன்றத்தின் பாதுகாப்புச்சபையும், தனது பெரும் கவலையை வெளியிட்டுள்ளது.
இலங்கை விடயம் குறித்து மூடிய கதவுகளுக்கு பின்னால் நடத்தப்பட்ட ஆலோசனைக்குப் பிறகு வெளியே வந்த ரஷ்யாவின் ஐ.நாவுக்கான தூதர் விடாலி சர்கின் அவர்கள், அதிகாரப் பூர்வமாக கட்டுப்படுத்தாத அறிக்கை ஒன்றை வாசித்தார்.

அதில், இலங்கையின் வடக்குப் பகுதியில் மோசமாகிவரும் மனிதாபிமான அவல நிலைமைகள் குறித்து, ஐ.நா பாதுகாப்புச் சபையின் பதினைந்து உறுப்பினர்களும், பெரும் கவலையடந்திருப்பதாக தெரிவிக்கப்பட்டிருந்தது.


குறிப்பாக, சமீப நாட்களில் நூற்றுக் கணக்கான பொதுமக்கள் கொல்லப்பட்டதாக வெளியான செய்திகள் குறித்து அவர்கள் பெரும் கவலையடைவதாக ரஷ்ய தூதுவர் கூறினார்.

விடுதலைப்புலிகள் அமைப்பினர் பல ஆண்டுகளாக நடத்தி வரும் பயங்கரவாத நடவடிக்கைகள் மற்றும் தற்போது அவர்கள் பொதுமக்களை பணயக் கைதிகளாக பிடித்து வைத்துக்கொண்டு, மனித கேடயங்களாக அவர்களை பயன் படுத்துவதை மிகக்கடுமையாக கண்டிப்பதாக தெரிவித்த அவர், பயங்கரவாதத்தை எதிர்கொள்வதில் இலங்கை அரசுக்கு இருக்கும் சட்டரீதியான உரிமையை தாங்கள் அங்கீகரிப்பதாகவும் கூறினார்.

விடுதலைப்புலிகள் தங்களின் ஆயுதங்களை கீழே போட்டு விட்டு, தங்களின் கட்டுப்பாட்டில் இருக்கும் பல்லாயிரக் கணக்கான பொதுமக்களை அங்கிருந்து வெளியேற அனுமதிக்க வேண்டும் என்று கோரிய ஐ.நா மன்றத்தின் பாதுகாப்புசபையின் உறுப்பு நாடுகள், பொதுமக்கள் செறிவாக வாழும் இடங்களில் இலங்கை அரசு கனரக ஆயுதங்களை கொண்டு தாக்குதல் நடத்துவதாக வெளியாகும் செய்திகளை கண்டு தாங்கள் ஆழ்ந்த கவலை கொள்வதாகவும் தெரிவித்துள்ளன.


இந்த அறிக்கைக்கான மூலவடிவம் கடந்த திங்கட்கிழமை அங்கு சென்ற பிரிட்டன், பிரான்ஸ் மற்றும் ஆஸ்திரிய நாடுகளின் வெளியுறவு அமைச்சர்களால் முன்மொழியப்பட்டதாக கூறப்படுகிறது.

இவர்கள் இலங்கையின் மிகமோசமான மனிதாபிமான நிலைமைகள் தொடர்பில் ஐ.நா மன்றத்தின் பாதுகாப்பு சபை விவாதிக்க வேண்டும் என்று வலியுறுத்திவந்தது குறிப்பிடத்தக்கது.

இலங்கை நிலைமைகள் சமீப காலத்தில் மிகமோசமான கட்டத்தை எட்டிய பிறகு, ஐநாவின் பாதுகாப்புச்சபையால் வெளியிடப்பட்ட முதலாவது கடுமையான அறிக்கையாக இது பார்க்கப்படுகிறது.

அம்னெஸ்டி இண்டர் நேஷனல், ஹூமன் ரைட்ஸ் வாட்ச் போன்ற சர்வதேச மனித உரிமைகளுக்கான அமைப்புக்கள் இலங்கையில் சார்வதேச சட்டங்கள் அப்பட்டமாக மீறப்படுவதற்கான வலுவான சான்றுகள் உருவாகி வருவதாகவும், அது குறித்து ஐ.நா மன்றத்தின் பாதுகாப்புச்சபை உரிய நடவடிக்கை எடுக்க வேண்டும் என்றும் கோரிக்கை விடுத்த பின்னணியில் இந்த அறிக்கை இன்று வெளியாகியிருப்பதாகவும் அங்குள்ள செய்தியாளர்கள் சுட்டிக்காட்டுகிறார்கள்.

BBC Tamil

Read more...

இலங்கை நிலைமைகள் குறித்து அமெரிக்க அதிபர் ஒபாமா கவலை

இலங்கையில் விடுதலைப்புலிகள் அமைப்புக்கும், இலங்கை அரசாங்கப் படைகளுக்கும் இடையில் நடக்கும் மோதலில் அகப்பட்டுள்ள பல்லாயிரக்கணக்கான மக்களின் நிலைமை குறித்து தான் மிகுந்த கவலை கொண்டுள்ளதாக அமெரிக்க அதிபர் பராக் ஒபாமா கூறியுள்ளார்.
இன்று வெள்ளை மாளிகையில் அவர் ஆற்றிய செய்தி ஊடகங்களுக்கான உரையின் போதே அவர் இதனை தெரிவித்தார்.

விடுதலைப்புலிகள் தம்வசம் உள்ள ஆயுதங்களை களைந்து தாம் பிடித்து வைத்திருக்கும் பொதுமக்களை விடுதலை செய்ய வேண்டும் என்று கூறியுள்ள ஒபாமா அவர்கள், அங்குள்ள மனித அவலத்துக்கு தீர்வுகாண இலங்கை அரசாங்கம் பல நடவடிக்கைகளை உடனடியாக செய்ய வேண்டும் என்றும் பரிந்துரைத்துள்ளார்.


''விடுதலைப்புலிகள் தமது ஆயுதங்களை கைவிட்டு, தம்வசம் உள்ள மக்களை வெளியேறிச் செல்ல அனுமதிக்க வேண்டும். மக்களை பலவந்தமாக படைக்கு ஆட்சேர்ப்புச் செய்வதும் மற்றும் அவர்களை மனித கேடயமாக பயன்படுத்துவதும் மிகவும் கண்டிக்கத்தக்கவையாகும். இப்படியான நடவடிக்கைகள் அவற்றைச் செய்வோரை தனிமைப்படுத்த மாத்திரமே உதவும்.'' என்றார் ஒபாமா.

அதேவேளை இந்த மனித அவலத்தை ஒழிக்க இலங்கை அரசாங்கமும் பல நடவடிக்கைகளை மேற்கொள்ள வேண்டும் என்றும் அவர் கேட்டிருக்கிறார்.

''முதலாவதாக பல நூற்றுக்கணக்கான உயிர்களையும், மருத்துவமனைகளையும் பலிகொண்ட கண்மூடித்தனமான எறிகணைத் தாக்குதலை அரசாங்கம் நிறுத்த வேண்டும். மோதல் பகுதியில் கனரக ஆயுதங்களை பயன்படுத்துவதில்லை என்ற தனது உறுதிமொழியை அரசாங்கம் கடைப்பிடிக்க வேண்டும். இரண்டாவதாக, மோதல் பகுதியில் அகப்பட்டுள்ள மக்களுக்கு, அவர்களது உயிர்களை காப்பாற்றிக் கொள்வதற்கு உதவக்கூடிய உதவிகளை வழங்குவதற்காக, ஐக்கிய நாடுகள் சபையின் உதவிக்குழுக்களை உள்ளே செல்ல அரசாங்கம் அனுமதி வழங்க வேண்டும். அத்துடன், மூன்றாவதாக இந்த மோதலில் இடம்பெயர்ந்துள்ள ஒரு லட்சத்து தொண்ணூறாயிரம் மக்களுக்கு உதவுவதற்கு ஐக்கிய நாடுகள் சபையையும், செஞ்சிலுவைச் சங்கத்தையும் அரசாங்கம் அனுமதிக்க வேண்டும்.'' என்றார் அதிபர் ஒபாமா.


''இலங்கை மக்கள் துயருறுகின்ற இந்த வேளையில், அவர்களுக்கு உதவுவதற்கு சர்வதேச சமூகத்துடன் இணைத்து செயற்பட அமெரிக்க தயாராக இருக்கிறது. நாம் இனிமேலும் தாமதிக்கலாம் என்று நான் கருதவில்லை. அங்கு மேலும் மனிதாபிமான அவலங்கள் ஏற்படுவதை தடுப்பதற்கு நாம் இணைந்து செயற்பட வேண்டிய தருணம் வந்துள்ளது.'' என்றார் ஒபாமா.

''இவற்றுக்கு எல்லாம் அப்பால், இலங்கை மக்கள் எல்லாரையும் அங்கீகரித்து, அவர்களுக்கு மதிப்பளிக்கும் வகையிலான நிரந்தர சமாதனம் ஒன்று இலங்கையில் ஏற்படுத்தப்பட வேண்டும். அதிகரிக்கின்ற மனித இழப்புகளும், மறுவாழ்வு முகாம்களில் போதுமான வசதிகள் இல்லாமையும், இலங்கையில் மக்கள் எதிர்பார்க்கின்ற அமைதியை பெறுவதை மேலும் கடினமாக்கவே உதவும்.'' என்று கூறினார் அமெரிக்க அதிபர் ஒபாமா.

BBC Tamil

Read more...

பிரான்ஸில் வீதிமறியல்: பேருந்து எரிப்பு

இலங்கை மோதல்களை நிறுத்தக் கோரி, பிரான்ஸின் தலைநகர் பாரிஸில் றீபப்ளிக் என்னும் இடத்தில் உள்ள முக்கிய வீதிச் சந்திப்பில், அங்கு புலம்பெயர்ந்து வாழுகின்ற தமிழர்களால் ஒரு ஆர்ப்பாட்டம் நடத்தப்பட்டுள்ளது.

அந்த இடத்தில் சுற்றுலாப் பயணிகளுக்கான பேருந்து ஒன்றும் எரிக்கப்பட்டதாக அங்கிருந்து வரும் தகவல்கள் கூறுகின்றன.

அங்கு என்ன நடந்தது என்பது குறித்து பிரான்ஸ் தமிழ் சங்கங்களின் கூட்டமைப்பின் பொறுப்பாளரான ரி. பாலசுந்தரம் அவர்களின் செவ்வியை நேயர்கள் இன்றைய காலை ஒலிபரப்பில் கேட்கலாம்.

BBC Tamil

Read more...

'இலங்கை விவகாரத்தில் இருவேறு வழிகளில் நடவடிக்கை'-அமெரிக்க அரசுத்துறை

இலங்கையில் மனிதாபிமான நிலைமைகளை மேம்படுத்துவதற்கான நடவடிக்கையில், நிறைய செய்ய வேண்டியிருப்பதாக அமெரிக்க அரசுத்துறைச் செயலர் ஹிலாரி கிளிண்டன் அவர்கள் கூறியுள்ளார்.

வாஷிங்டனில் பிரிட்டிஷ் வெளியுறவு அமைச்சர் டேவிட் மிலிபாண்ட் அவர்களுடன் கூட்டாக நடத்திய செய்தியாளர் சந்திப்பு ஒன்றில் உரையாற்றிய கிளிண்டன் அவர்கள், அங்கு நடக்கின்ற மோதல்களில் அகப்பட்டுள்ள மக்களை பாதுகாப்பாக அங்கிருந்து வெளியேற்றுவதற்கு உதவ முயற்சிக்க வேண்டியுள்ளது என்றார்.

இதற்கிடையே இலங்கை விவகாரம் தொடர்பில் அமெரிக்க அரசுத்துறை இரு வேறு வழிகளில் பல நடவடிக்கைகளை எடுத்து வருவதாக அமெரிக்க அரசுத்துறையின் சார்பில் பேசவல்ல அதிகாரியான இயான் கெலி கூறியுள்ளார்.

தினசரி செய்தியாளர் சந்திப்பில் கேட்கப்பட்ட கேள்விகளுக்கு பதிலளிக்கும் வகையில் உரையாற்றிய அவர், இரு வேறு வழிகளில் அரசுத்துறை இதற்கான நடவடிக்கைகளை எடுத்து வருவதாக குறிப்பிட்டார்.

இந்த இராஜதந்திர முயற்சிகளை பொறுத்தவரை முதல் வழியாக ஐக்கிய நாடுகள் சபையின் ஊடாகவும், ஏனைய நாடுகளின் அரசாங்கங்களுடனும் அமெரிக்க அரசுத்துறை பேச்சுவார்த்தைகளை நடத்தி வருவதாக அவர் குறிப்பிட்டார்.

இரண்டாவது வழிமுறையாக இலங்கை அரசாங்கத்துடன் நேரடியாக தொடர்புகளை ஏற்படுத்தி, கனரக ஆயுதங்களை பயன்படுத்துவதை தடுப்பதற்கும், அங்குள்ள அகதிகளுக்கான முகாம்களை சர்வதேச தரத்துக்கு மேம்படுத்துவதற்கான அழுத்தங்களை கொடுப்பதற்கும் முயற்சிப்பதாகவும் அவர் கூறினார்.

BBC Tamil

Read more...

இலங்கை இராணுவத்தினர் மேலும் முன்னேறியதாக அறிவிப்பு

இலங்கையின் வடக்கே வன்னியில் விடுதலைப்புலிகளுக்கெதிரான இராணுவ நடவடிக்கையில் ஈடுபட்டுள்ள இலங்கைப் படையினர் இரட்டைவாய்க்கால் பகுதியிலுள்ள புலிகளின் இறுதி நிலைகளை நோக்கி மேலும் சுமார் 800 மீட்டர்கள் வரை திங்கட்கிழமை முன்னேறியிருப்பதாக இலங்கை பாதுகாப்பு அமைச்சு தெரிவித்திருக்கிறது.

இது குறித்து இன்று அதிகாலை தகவல் வெளியிட்டிருக்கும் பாதுகாப்பு அமைச்சு, இரட்டைவாய்க்கால் பகுதியின் தெற்குப்பகுதியில் நிலைகொண்டிருந்த 58வது பிரிகேட் படைப்பிரிவின் துருப்புக்கள், மேலும் சுமார் 800 மீட்டர்கள் முன்னேறி புலிகளின் ஆட்டிலறி துப்பாக்கிநிலை உள்ளிட்ட பல நிலைகளை கைப்பற்றி அழித்திருப்பதாகவும், தற்போது புதிதாக அரசினால் மோதல்களற்ற பிரதேசமாக அறிவிக்கப்பட்டிருக்கும் இரண்டு கிலோ மீட்டர் பகுதிக்கு அருகாக நிலைகொண்டிருப்பதாகவும்
தெரிவித்திருக்கிறது.


திங்கட்கிழமை மேற்கொள்ளப்பட்ட இந்த நடவடிக்கையின்போது புலிகளிடமிருந்து பெருந்தொகையான ஆயுதங்கள், கனரக வாகனங்கள், விசைப்படகுகள் உட்பட பல இராணுவ உபகரணங்களை கைப்பற்றியிருப்பதாகவும் அதில் தெரிவிக்கப்பட்டிருக்கிறது.

புலிகள் இந்தப் பகுதிகளில் பெருந்தொகையான மிதிவெடிகளையும், பொறிவெடிகளையும் புதைத்து வைத்துவிட்டுச் சென்றிருப்பதாகவும், ஆனாலும் படையினர் அந்தத் தடைகளையும் தாண்டி புதிதாகக் கைப்பற்றிய நிலைகளைப் பலப்படுத்திவருவதாகவும் பாதுகாப்பு அமைச்சு தெரிவித்திருக்கிறது.

இதுகுறித்து விடுதலைப்புலிகள் தரப்பிலிருந்து இதுவரை செய்திகள் ஏதும் வெளியாகவில்லை.

BBC Tamil

Read more...

இலங்கையின் வடக்கே கடும் தாக்குதல்:378 பேர் பலி, 1122 பேர் காயம்

இலங்கையின் வடக்கே முள்ளிவாய்க்கால் பகுதியில் சனிக்கிழமை இரவும், இன்று ஞாயிற்றுகிழமை பிற்பகல் வரை இடம் பெற்ற கடும் ஷெல் மற்றும் வான்வழித் தாக்குதலில் 378 பேர் பலியாகியுள்ளதாக அங்கிருக்கும் அரச மருத்துவர் தமிழோசையிடம் உறுதிப்படுத்தியுள்ளார்.
இந்தத் தாக்குதல்களில் 1122 பேர் காயமடைந்துள்ளதாகவும் அவர் கூறுகிறார். முள்ளிவாய்க்கால் பகுதியில் இயங்கி வரும் தற்காலிக மருத்துவமனைக்கு வந்துள்ள 378 உடல்களில், 106 உடல்கள் 15 வயதுக்கு உட்பட்ட சிறார்களுடையது என்றும் அவர் மேலும் தெரிவித்தார்.

மருத்துவமனைக்கு வந்தவர்கள் மேலும் பல சடலங்கள் வீதிகளில் இருப்பதாக தம்மிடம் கூறியதாகவும் அந்த அரச மருத்துவர் மேலும் தெரிவித்தார்.

தாக்குதலில் காயமடைந்தவர்களை மேலதிக சிகிச்சைக்காக மற்ற பகுதிகளுக்கு கொண்டு செல்வது குறித்து சர்வதேச செஞ்சிலுவைச் சங்கத்துடன் தாங்கள் தொடர்பில் இருப்பதாகவும் அந்த அரச மருத்துவர் கூறுகிறார்.

அப்பகுதியில் ஷெல் தாக்குதல்கள் ஏதும் நடைபெறவில்லை என்று தெரிவித்துள்ள இலங்கை அரசின் இராணுவ விவகாரங்களுக்கான பேச்சாளர் கெஹலிய ரம்புக்வெல்ல, இது விடுதலைப் புலிகள் ஒரு பிரச்சாரமே என்றும் பிபிசியிடம் தெரிவித்தார்.

ஆனால் தங்கள் விடுதலைப் புலிகளிடமிருந்து எந்த விதமான அழுத்தங்களையும் சந்திக்கவில்லை என்று அந்த அரச மருத்துவர் தமிழோசையிடம் தெரிவித்தார்.

போர் நடக்கும் பகுதிகளுக்கு செய்தியாளர்கள் அனுமதிக்கப்படாத காரணத்தால் தகவல்களை சுயாதீனமான வகையில் உறுதிப்படுத்த முடியவில்லை.

BBC Tamil

Read more...

இலங்கையின் வடக்கில் இருந்து 2 லட்சம் பேர் இடம்பெயர்வு - ஐ.நா

இலங்கையின் வடக்கே மோதல் பிரதேசங்களில் இருந்து இராணுவத்தின் கட்டுப்பாட்டில் உள்ள பகுதிகளுக்கு இதுவரையில் சுமார் 2 இலட்சம் பேர் இடம்யெபர்ந்து வந்துள்ளதாகத் தெரிவித்துள்ள ஐநா மன்றத்தின் மனிதாபிமான விவகாரங்களுக்கான இணைப்பு அலுவலகம் இவர்களில் 1741 பேர் காயமடைந்தவர்கள் மற்றும் நோயாளர்கள் எனவும் கூறியிருக்கின்றது.

வவுனியா மனிக்பாம் பகுதியில் தங்க வைக்கப்பட்டுள்ள குடும்பங்களைச் சேர்ந்த விசேட தேவைக்குட்பட்டவர்களுக்கென அவசரகாலத்தில் பயன்படுத்தப்படும் 300 கூடாரங்கள் ஐநா மன்றத்தின் அகதிகளுக்கான நிறுவனத்தினரால் வழங்கப்பட்டுள்ளதாகவும் எல்லைகளற்ற மருத்துவர்கள் என்ற பிரான்ஸ் நாட்டு மருத்துவ உதவி நிறுவனம் இந்தப் பகுதியில் சுகாதார அமைச்சின் அனுமதியோடு வெளிக்கள மருத்துவமனை ஒன்றை அமைப்பதற்கான நடவடிக்கைகளில் ஈடுபட்டிருப்பதாகவும் ஐநா மன்றத்தின் மனிதாபிமான விவகாரங்களுக்கான இணைப்பு அலுவலகம் தெரிவித்திருக்கின்றது.

இதுபற்றிய மேலதிக விபரங்களை இன்றைய செய்தியரங்கத்தில் கேட்கலாம்.

BBC Tamil

Read more...

இலங்கையில் உள்ள உறவினர்களை தொடர்பு கொள்ளாமல் புலம்பெயர்ந்தவர்கள் தவிப்பு

இலங்கையில் விடுதலைப் புலிகளின் பகுதிகளில் தொலைபேசி வசதிகளை அரசு பல மாதமாக துண்டித்து விட்டது. போர் உக்கிரமடைந்ததுவிட்டதன் காரணமாக புலிகளின் அனுசரணையுடன் நடத்தப்படும் செய்மதி தொலை பேசி வழியாக வன்னியில் இருப்பவர்கள் தமது உறவினர்களை தொடர்பு கொள்வதும் குறைந்து விட்டது. மற்றொறு புறும் வவூனியா முகாம்களில் இருப்பவர்களை எப்படி தொடர்பு கொள்வது என்பது தெரியாத நிலையும் உள்ளது.
இதனால் புலம்பெயர்ந்த நாடுகளில் உள்ள தமிழர்கள் இலங்கையில் உள்ள தமது உறவினர்கள் பற்றிய தகவல்களை அறிய முடியாமல் தவித்து வருகின்றனர்.

வவூனியா முகாம்களில் உள்ளவர்களின் வசதிக்காக தபால் நிலையங்கள் ஆரம்பிக்கப்பட்டுள்ளதாகவும், இரண்டு நிவாரணக் கிராமங்களுக்கு தொலை பேசி இணைப்புகள் ஏற்கனவே ஏற்படுத்திக் கொடுக்கப்பட்டதாகவும் தெரிவித்த அனர்த்த நிவாரண அமைச்சர் ரிசாத் பதியுதீன், முகாம்கள் இருக்கும் பகுதியில் வங்கிக் கிளைகள் திறக்கும் பணியும் நடைபெற்று வருவதாகத் தெரிவித்தார். வவூனியா முகாம்களுக்கு ஏராளமானோர் வந்துள்ள நிலையில் வந்தவர்களின் விபரங்கள் சேகரிக்கப்படுவதாகவும் அவர் கூறினார்

இது தொடர்பாக புலம்பெயர்ந்தவர்கள் கூறும் கருத்துக்களை இன்றைய தமிழோசையில் நேயர்கள் கேட்கலாம் .

BBC Tamil

Read more...

இலங்கையின் வடக்கே தொடரும் மோதல்

இலங்கையின் வடக்கே முல்லைத்தீவு கடற்பரப்பில் சனிக்கிழமையன்று கடற்படையினர் மீது தாக்குதல் நடத்திய கடற்புலிகளின் படகுகள் மீது படையினர் நடத்திய எதிர்தாக்குதலில் 14 விடுதலைப்புலிகள் கொல்லப்பட்டிருப்பதாகவும், விடுதலைப்புலிகளின் இரண்டு படகுகள் அழிக்கப்பட்டுள்ளதுடன் மேலும் இரண்டு படகுகளை படையினர் கைப்பற்றியிருப்பதாகவும் இராணுவத் தலைமையகம் தெரிவித்திருக்கின்றது.
புதிதாக அரசாங்கத்தினால் அறிவிக்கப்பட்டுள்ள பாதுகாப்பு வலயத்திற்கு வெளியே விடுதலைப்புலிகளுக்கும் இராணுவத்தினருக்கும் இடையே இடம்பெற்ற கடும் சண்டைகளைத் தொடர்ந்து முல்லைத்தீவு கடற்பரப்பில் இந்த மோதல்கள் இடம்பெற்றிருப்பதாகப் பாதுகாப்பு அமைச்சகம் கூறியிருக்கின்றது.

தரையில் நடைபெற்ற மோதல்களின்போது விடுதலைப்புலிகள் கடும் எதி்ர்ப்பைக் காட்டியதாகவும், இந்தச் சண்டைகளில் விடுதலைப்புலிகளின் 35 உடல்களை இராணுவத்தினர் கைப்பற்றியிருப்பதாகவும் பாதுகாப்பு அமைச்சகம் தெரிவித்திருக்கின்றது.

கடற்படையினரால் தாக்கி அழிக்கப்பட்ட படகுகளில் ஒன்று விடுதலைப்புலிகளின் தற்கொலைத்தாக்குதல் படகு என்றும், மற்றையது விடுதலைப்புலிகளின் தாக்குதல் படகு என்றும் கைப்பற்றப்பட்ட படகு ஒன்றில் விடுதலைப்புலிகளின் இரண்டு இறந்த உடல்கள் காணப்பட்டதாகவும் இராணுவ தலைமையகம் விபரம் வெளியிட்டிருக்கின்றது.

இதனிடையே, முல்லைத்தீவு மாவட்டத்தின் சிவிலியன்களுக்கான பாதுகாப்பு பிரதேசத்திலிருந்து முல்லைத்தீவு பாலம் வழியாகத் தப்பி வந்த பொதுமக்கள் அடங்கிய குழு ஒன்றின் மீது விடுதலைப்புலிகள் வெள்ளிகிழமையன்று நடத்திய துப்பாக்கி்ப்பிரயோகத்தில் ஒருவர் கொல்லப்பட்டதாகவும் 17 பொதுமக்கள் காயமடைந்ததாகவம் பாதகாப்பு அமைச்சகம் கூறியிருக்கின்றது.

எனினும் இது குறித்து விடுதலைப்புலிகள் தரப்பிலிருந்து தகவல்கள் எதுவும் உடனடியாக வெளியாகவில்லை.

BBC Tamil

Read more...

இலங்கைக்கு இந்திய இராணுவம் செல்வது எளிதல்ல - இந்திய பிரதமர்

இலங்கைத் தமிழர்களை பாதுகாப்பதற்கு இராணுவத்தை அனுப்புவது என்பது சர்வதேச சட்டங்களுக்கு முரணானது என இந்திய பிரதமர் டாக்டர் மன்மோகன் சிங் அவர்கள் சென்னையில் செய்தியாளர்கள் மாநாட்டில் கேட்கப்பட்ட கேள்வி ஒன்றுக்கு பதிலளிக்கும் போது தெரிவித்துள்ளார்.
இலங்கை ஒரு இறையாண்மை கொண்ட நாடு என்றும், சுயாதீனம் கொண்ட நாட்டில் தலையிடுவதில் வரையறைகள் உள்ளன என்றும் அவர் கூறினார். அத்தோடு இலங்கையில் உள்ள தமிழர்கள் அனைத்து உரிமைகளும் பெற்று வாழ வேண்டும் என்று இந்தியாவில் உள்ள அனைவருமே விரும்புவதாகவும் பிரதமர் குறிப்பிட்டார்.

மேலும் விடுதலைப்புலிகள் தலைவர் பிரபாகரன் ஒரு தேடப்பட்டு வரும் குற்றவாளி என்றும், ஆனால் தற்போது அதுவல்ல பிரச்சனை என்றும், இலங்கை தமிழர்கள் எல்லா நலனும் பெற்று நன்றாக வாழ வேண்டும் என்பது தான் இப்போது முக்கியமான விஷயம் என்றும் பிரதமர் கேள்வி ஒன்றுக்கு பதிலளிக்கும் போது கூறினார்.

அத்தோடு, இலங்கை பிரச்சனைக்கு அரசியல் தீர்வே சரி என்பதை இலங்கை மக்களும், அரசும் உணர வேண்டும் என்றும் இந்தியப் பிரதமர் குறிப்பிட்டார்.

BBC Tamil

Read more...

திருகோணமலை சிறுமி கொலை வழக்கின் மற்றுமொரு சந்தேக நபர் மரணம்

திருகோணமலையில் கடந்த 11 ஆம் திகதியன்று கடத்திச் செல்லப்பட்ட, ஆறுவயதுச் சிறுமி, ரெஜி ஜூட் வர்ஷா, பின்னர் பாலியல் வல்லுறவுக்குட்படுத்தப்பட்டு கொலை செய்யப்பட்ட கொடூர சம்பவம் தொடர்பாக திருகோணமலை போலிஸாரால் கைது செய்யப்பட்ட எட்டு பேரில் இன்று மேலும் ஒருவர் இறந்துள்ளார்.
சந்தேக நபர்களில் ஒருவரான, வரதராஜா ஜனார்த்தனன் என்ற இவர், போலிஸாரால் விசாரணைக்கெனக் கொண்டுசெல்லப்பட்ட போது, சயனைட் அருந்தி உயிரிழந்துள்ளார் என்று போலிஸார் தெரிவித்தனர்.

ஏற்கனவே, கைது செய்யப்பட்ட, மற்றொருவரான, ரினவுன்ஸன் சனிக்கிழமையன்று விசாரணைக்கென கொண்டுசெல்லப்பட்டபோது, தப்பியோட முனைந்ததாகவும் அப்போது போலிஸாரால் துப்பாக்கிப் பிரயோகத்துக்கு இலக்காகி இறந்ததாகவும் போலிஸார் தெரிவித்தனர்.
இன்று இறந்த ஜனார்த்தனன், ஆயுதங்கள் மறைத்து வைக்கப்பட்டிருப்பதாக கூறியதைத் தொடர்ந்து, திருகோணமலையின் பத்தாங்குறிச்சிப் பகுதிக்கு அழைத்துச்செல்லப்பட்டபோது, அங்கு இரண்டு கைக்குண்டுகள் கைப்பற்றப்பட்டதாகவும் போலிஸார் தெரிவித்தனர். இதனையடுத்து உப்புவெளி பகுதியில் ஆயுதங்கள் இருப்பதாக சந்தேக நபர் தெரிவிக்க, அங்கு கொண்டு சென்றபோதே அவர் சயனைட் அருந்தி உயிரிழந்ததாகவும் தெரிவிக்கப்படுகின்றது.

இதேவேளை இந்த சந்தேக நபர்களில் சிலர் ஆளும் தமிழ் மக்கள் விடுதலைப்புலிகள் இயக்கத்தின் உறுப்பினர்கள் என்று போலிஸார் நேற்று தெரிவித்திருந்தனர். இது குறித்தும், இந்த விசாரணையில் போலிஸ் காவலில் இருந்த இருவர் இறந்திருப்பது குறித்தும், கிழக்கு மாகாண முதலமைச்சரும், தமிழ் மக்கள் விடுதலைப்புலிகள் அமைப்பின் தலைவருமான சிவனேசத்துரை சந்திரகாந்தன் அவர்களின் செவ்வியை நேயர்கள் இன்றைய நிகழ்ச்சியில் கேட்கலாம்.

Read more...

விடுதலைப்புலிகளின் கட்டுப்பாட்டில் உள்ள மக்களின் அவல நிலைமை குறித்து இந்த உலகத்துக்கு எதுவுமே தெரியயாது

'மோதல்கள் தொடர்ந்தால் இலங்கையில் மேலும் பலர் உயிரிழப்பார்கள்'- எம்.எஸ்.எஃப்

இலங்கை அரசாங்கத்துக்கும், விடுதலைப்புலிகளுக்கும் இடையிலான மோதல்கள் உடனடியாக நிறுத்தப்படாவிட்டால், வட இலங்கையில் மேலும் பல பொதுமக்கள் உயிரிழக்கவும், காயமடையவும் நேரிடும் என்று சர்வதேச உதவி நிறுவனம் ஒன்று எச்சரித்துள்ளது.
மோதல் பகுதிகளில் அகப்பட்டு அவதியுறும் சுமார் இரண்டு லட்சம் மக்களில் நிலைமை குறித்து வெளியுலகம் இன்னமும் பெருமளவுக்கு தெரிந்துகொள்லாமலேயே இருக்கிறது என்று எம்.எஸ்.எஃப் என்று அழைக்கப்படுகின்ற எல்லைகளற்ற மருத்துவர்கள் என்னும் பிரான்ஸை தலைமையகமாகக் கொண்ட அமைப்பின் தலைவி கூறியுள்ளார்.

இந்த மோதல்களில் நூற்றுக்கணக்கான சிறார்கள் உட்பட கிட்டத்தட்ட 2000 பொதுமக்கள் இறந்துபோயுள்ளதாக ஐக்கிய நாடுகள் சபை கூறிய சில நாட்களின் பின்னர் இந்த எச்சரிக்கை வந்துள்ளது.

விடுதலைப்புலிகளுக்கும் இலங்கை இராணுவத்துக்கும் இடையில் நடக்கின்ற மிகவும் கொடூரமான சண்டைகளில் பொதுமக்கள் மிகவும் மோசமாக பாதிக்கப்பட்டுள்ளதாக எம்.எஸ்.எஃப் கூறுகின்றது.

நான்கு மாதங்களாக ஒரு பதுங்குகுளியில் தனது குழந்தையுடன் ஒளிந்திருந்த ஒரு தாயை எம் எஸ் எஃப் மருத்துவர்கள் பார்த்திருக்கிறார்கள்.

அடுத்த ஒரு பெண்ணின் இரு குழந்தைகள் முதலில் எறிகணையில் உயிரிழந்திருக்கிறார்கள். பின்னர் அந்தப் பெண்ணின் கணவனுக்கு எறிகணை தாக்கியதில் அவரது ஒரு காலும், ஒரு கையும் இழந்துபோன நிலையில் அவரும் பின்னர் காணாமல் போயுள்ளார்.

இங்கு விடுதலைப்புலிகளின் கட்டுப்பாட்டில் உள்ள மக்களின் அவல நிலைமை குறித்து இந்த உலகத்துக்கு எதுவுமே தெரியயாது என்றும் கூறுகிறார் எம்.எஸ்.எஃப் அமைப்பின் இலங்கைக்கான தலைவியான அன்னமரி லூவ்.

35 சதுர கிலோ மீட்டர்கள் வரை சுருங்கிப் போயுள்ள ஒரு சிறிய நிலப்பரப்பில், இந்த தருணத்தில் இரண்டு லட்சம் மக்கள் இருக்கின்றார்கள் என்றும், இந்த இடத்தில் பெரும்பாலானவை கடற்கரையும், காடுந்தான் என்றும் அன்ன மரி கூறியுள்ளார்.

போதுமான மருந்தும் கிடையாது என்பதுடன், இவையெல்லாவற்றுக்கும் மேலாக அவர்களை சுற்றித்தான் கடுமையான சண்ட நடக்கிறது என்றும்,
இதெல்லாம் உயிர்வாழ்வதற்கான கௌரவமான வழி அல்ல என்றும் அவர் கூறியுள்ளார்.

வட பகுதியில் இலங்கை அரசாங்கத்தால் நடத்தப்படும் முகாமில் தங்கியுள்ள மக்கள் சுதந்திரமாக நடமாடுவதற்கான வாய்ப்பு கிடையாது என்றும் அவர் கூறுகிறார்.

அதேவேளை, பொதுமக்கள் மோதல் பகுதிகளில் இருந்து வெளியேறுவதை விடுதலைப்புலிகள் தடுப்பதாகவும் அவர் கூறுகிறார்.

விடுதலைப்புலிகள் கட்டுப்பாட்டுப் பகுதியில் இருந்து தப்புவதற்காக தான் கடந்த 6 இரவுகள் தொடர்ச்சியாக முயற்சி செய்ததாககவும், தப்ப முயற்சித்தவர்கள் மீது விடுதலைப்புலிகள் சுட்டதாகவும், தனது முன்னாள் ஊழியை ஒருவர் தன்னிடம் கூறியதாகவும் அன்ன மரி கூறியுள்ளார்.

Read more...